കൊച്ചി: ശ്രീലങ്കയിലേക്ക് മത്സ്യം കയറ്റി അയച്ച കേസുമായി ബന്ധപ്പെട്ട് ലക്ഷദ്വീപ് എംപി മുഹമ്മദ് ഫൈസലിനെ എന്ഫോഴ്സ്മെന്റ് ഡയറക്ടറേറ്റ് (ഇഡി) ചോദ്യം ചെയ്തു. കൊച്ചി ഓഫീസില് രാവിലെ തുടങ്ങിയ ചോദ്യം ചെയ്യല് വൈകിട്ടോടെ അവസാനിച്ചു.
കഴിഞ്ഞ ജൂണ് 25ന് മുഹമ്മദ് ഫൈസലിന്റെ വീട്ടിലും ഔദ്യാഗിക വസതിയിലും എന്ഫോഴ്സ്മെന്റ് ഡയറക്ടറേറ്റ് പരിശോധന നടത്തിയിരുന്നു. ആന്ത്രോത്തിലെ വീട്, ദല്ഹിയിലെ ഔദ്യോഗിക വസതി, എറണാകുളത്തെ വീട്, കോഴിക്കോട് ബേപ്പൂരുള്ള ഒരു സ്ഥാപനം എന്നിവിടങ്ങളിലാണ് പരിശോധന നടത്തിയത്. സാമ്പത്തിക ഇടപാട് രേഖകളും പിടിച്ചെടുക്കുകയുണ്ടായി.
ലക്ഷദ്വീപ് സഹകരണ മാര്ക്കറ്റിംഗ് ഫെഡറേഷനിലെ ചില ഉദ്യോഗസ്ഥരുമായി ചേര്ന്ന് ശ്രീലങ്കയിലേക്ക് മത്സ്യകയറ്റുമതി ചെയ്തതില് ക്രമക്കേട് നടത്തിയെന്നതാണ് കേസ്. സിബിഐ 2016-17 കാലത്ത് കേസെടുത്ത് അന്വേഷണം ആരംഭിച്ചിരുന്നു. പിന്നാലെയാണ് ഇഡിയും അന്വേഷണം നടത്തുന്നത്.
