കൊച്ചി: എറണാകുളം മഹാരാജാസ് കോളജ് ഗ്രൗണ്ടില്‍ നടക്കുന്ന സംസ്ഥാന ജൂനിയര്‍ ഫുട്‌ബോള്‍ ചാമ്പ്യന്‍ഷിപ്പില്‍ കാസര്‍കോടിന് ഹാട്രിക് വിജയം. ഇന്നലെ നടന്ന മത്സരത്തില്‍ പാലക്കാടിനെ എതിരില്ലാത്ത ആറ് ഗോളുകള്‍ക്ക് തോല്‍പ്പിച്ചാണ് ഗ്രൂപ്പ് എ ജേതാക്കളായി കാസര്‍ഗോഡ് സെമിഫൈനലില്‍ പ്രവേശിച്ചത്. ഉമര്‍ അഫാഫിന്റെ നാല് ഗോള്‍ മികവിലായിരുന്നു കാസര്‍കോടിന്റെ തകര്‍പ്പന്‍ വിജയം. ടൂര്‍ണമെന്റില്‍ ഉമര്‍ അഫാഫിന്റെ ഒന്‍പതാം ഗോള്‍ ആണിത്. ആദ്യ ദിനം കോഴിക്കോടിനെയും (4-2) പത്തനംതിട്ടയേയും (7-0) കാസര്‍കോട് തോല്‍പ്പിച്ചിരുന്നു. ഇന്നലെ നടന്ന ഗ്രൂപ്പ് എയിലെ അവസാന മത്സരത്തില്‍ പത്തനംതിട്ട കോഴിക്കോടിനെ 3-1ന് തോല്‍പിച്ചു. 22ന് വൈകിട്ട് 3 മണിക്ക് നടക്കുന്ന ആദ്യ സെമിയില്‍ ഗ്രൂപ്പ് സി ജേതാക്കള്‍ ആണ് കാസര്‍കോടിന്റെ എതിരാളികള്‍. 23ന് വൈകിട്ടാണ് കലാശക്കളി.
ഗ്രൂപ്പ് ബി മത്സരങ്ങള്‍ വെള്ളിയാഴ്ച തുടങ്ങി. ആദ്യ മത്സരത്തില്‍ ആതിഥേയരായ എറണാകുളം ആലപ്പുഴയെ ഒന്നിനെതിരെ എട്ട് ഗോളുകള്‍ക്ക് തകര്‍ത്തു. ക്യാപ്റ്റന്‍ കെവിന്‍ ടി അനോജ് ഹാട്രിക് നേടിയ മത്സരത്തില്‍, മധവേഷ് കൃഷ്ണ ഇരട്ട ഗോള്‍ സ്വന്തമാക്കി.
ഇന്നത്തെ മത്സരങ്ങള്‍: ആലപ്പുഴ തിരുവനന്തപുരം (രാവിലെ 7), എറണാകുളം കണ്ണൂര്‍ (8.30), കണ്ണൂര്‍ ആലപ്പുഴ (വൈകിട്ട് 3), തിരുവനന്തപുരം എറണാകുളം (4.30).
എറണാകുളം മഹാരാജാസ് കോളേജ് ഗ്രൗണ്ടില്‍ നടക്കുന്ന സംസ്ഥാന ജൂനിയര്‍ ഫുട്‌ബോള്‍ ചാമ്പ്യന്‍ഷിപ്പിലെ എറണാകുളം-ആലപ്പുഴ മത്സരത്തില്‍ നിന്ന്
