നാഗ്പൂര്: പൂര്വികരായ വയോജനങ്ങള് വാനപ്രസ്ഥത്തിലൂടെ സമൂഹത്തിന് നന്മകള് ചെയ്തിരുന്നവരാണെന്നും വര്ത്തമാനകാല വയോജനങ്ങള് സമൂഹം അവഗണിക്കുന്നുവെന്ന ചിന്ത മാറ്റിയെടുക്കാന് അതേ പാത പിന്തുടരാന് തയ്യാറാകണമെന്നും കേന്ദ്ര തൊഴില്, പഠന, ഗവേഷണ കേന്ദ്രം ചെയര്മാന് ബ്രിജേഷ് ഉപാദ്ധ്യായ പറഞ്ഞു. നാഗപൂര് മധുകര് ഭവനില് നടക്കുന്ന വരിഷ്ഠ നാഗരിക് പരിസംഘ് ദേശീയ പ്രവര്ത്തക സമിതി യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ദേശീയ പ്രസിഡന്റ് ഹസുഭായ് ദവെ അധ്യക്ഷത വഹിച്ചു. ജനറല് സെക്രട്ടറി വസന്ത് എം. പിമ്പിലാപൂര് സ്വാഗതവും ചന്ദ്രകാന്ത് എ. ദേശ്പാണ്ഡെ നന്ദിയും പറഞ്ഞു. യോഗത്തില് ബിഎംഎസ് ദേശീയ ജനറല് സെക്രട്ടറി രവീന്ദ്രഹിംഠേജി, ദേശീയ നേതാക്കളായ ശില്പാ പാണ്ഡെ, നീലം സേത്, സി.വി. രാജേഷ്, രാംറാവു വി. നവഗാരെ, ചിന്താറാണി എന്നിവര് പ്രസംഗിച്ചു.
കേരളത്തില് നിന്നും ദേശീയ പ്രവര്ത്തക സമിതി അംഗങ്ങളായ സി. മന്മഥന്പിള്ള, വി. സുധാകരന്, സീനിയര് സിറ്റിസണ് സംഘ് സംസ്ഥാന ജനറല് സെക്രട്ടറി കെ.വി. അച്ചുതന് എന്നിവര് പങ്കെടുക്കുന്നു. ദേശീയതലത്തില് വയോജനങ്ങള് നേരിടുന്ന വിവിധ പ്രശ്നങ്ങളില് ഇന്നും നാളെയുമായി നടക്കുന്ന പ്രവര്ത്തകസമിതിയോഗം ചര്ച്ച ചെയ്ത് പ്രക്ഷോഭ പരിപാടികള്ക്ക് രൂപം നല്കും.
