നിലമ്പൂര്: കരുളായിയില് സ്കൂള് അധ്യാപകന് പീഡിപ്പിച്ചെന്ന് ആരോപിച്ച് 16 വിദ്യാര്ഥികളുടെ പരാതി. വല്ലപ്പുഴ സ്വദേശി നൗഷാര് ഖാനെതിരേയാണ് വിദ്യാര്ഥികളുടെ പരാതി കിട്ടിയത്. വിവരം സ്കൂള് അധികൃതര് പോലീസില് അറിയിച്ചതോടെ പൂക്കോട്ടുംപാടം പോലീസ് അധ്യാപകനെതിരേ കേസെടുത്തു. പോക്സോ നിയമപ്രകാരമാണ് കേസ്.
കഴിഞ്ഞ ദിവസം സ്കൂളില് സ്ഥാപിച്ച പരാതിപ്പെട്ടി തുറന്ന് പരിശോധിച്ചപ്പോഴാണ് 16 പീഡനപരാതികള് സ്കൂള് അധികൃതര്ക്ക് ലഭിച്ചത്. ഇതിലെ എല്ലാ പരാതികളും അധ്യാപകനായ നൗഷാര് ഖാന് എതിരേയായിരുന്നു. ഉടന്തന്നെ സ്കൂള് അധികൃതര് വിവരം പോലീസില് അറിയിക്കുകയായിരുന്നു. തുടര്ന്ന് പോലീസ് എത്തി അന്വേഷിച്ചപ്പോള് ഒരു കുട്ടി പോലീസിനോടും അധ്യാപകന് പീഡിപ്പിച്ച കാര്യം പറഞ്ഞു. വിദ്യാര്ഥിയുടെ മൊഴി രേഖപ്പെടുത്തിയ പോലീസ് അധ്യാപകനെതിരെ പോക്സോ കേസ് രജിസ്റ്റര് ചെയ്തു. ജൂലൈ 20ന് അധ്യാപകന് ലൈംഗികമായി ഉപദ്രവിച്ചെന്നാണ് ഈ വിദ്യാര്ഥി മൊഴി നല്കിയത്.
അതേസമയം പോലീസ് കേസെടുത്തതിന് പിന്നാലെ അധ്യാപകനായ നൗഷാര് ഖാന് ഒളിവില്പോയി. ഇയാള്ക്കായി തിരച്ചില് ഊര്ജിതമാക്കിയിട്ടുണ്ടെന്നും സംഭവത്തില് കൂടുതല് വിദ്യാര്ഥികളുടെ മൊഴി രേഖപ്പെടുത്തുമെന്നും പോലീസ് അറിയിച്ചു.
