കേരളത്തിലെ ഒരു പരിപാടിയില്‍ പങ്കെടുത്തു വേദിയില്‍ നിന്ന് പുറത്തുപോകവെ താരസുന്ദരി തമന്നയ്‌ക്ക് കൈകൊടുക്കാന്‍ ആരാധകന്‍ ബാരിക്കേഡ് ചാടിക്കടന്നെത്തിയ വീഡിയോ സാമൂഹ്യമാധ്യമങ്ങളില്‍ വൈറലായി.ആവേശഭരിതനായ ആരാധകനെ സുരക്ഷാ ജീവനക്കാരന്‍ തടയുന്നുണ്ടെങ്കിലും തമന്ന അയാളെ വിലക്കി ആരാധകന്റെ കൈപിടിച്ചു കുലുക്കുന്നതാണ് വീഡിയോയിലുളളത്.
പച്ച സാരിയും പിങ്ക് ബ്ലൗസും ധാരാളം ആഭരണങ്ങളും ധരിച്ചാണ് താരസുന്ദരി ചടങ്ങിനെത്തിയത്.ചടങ്ങ് കഴിഞ്ഞ് ഇടനാഴിയിലൂടെ പുറത്തുപോകവെയാണ് ഇരുവശങ്ങളിലും തടിച്ചുകൂടി നിന്ന ജനക്കൂട്ടത്തില്‍ നിന്ന് ഒരു ആരാധകന്‍ ബാരിക്കേഡ് ചാടിക്കടന്നത്.ഏതായാലും ആരാധകനെ നിരാശനാക്കാന്‍ സുന്ദരി തയാറായില്ല. ഹസ്തദാനത്തിന് പുറമെ ആരാധകനൊപ്പം ഒരു സെല്‍ഫിക്കും തയാറായി.
തമന്നയുടെ പ്രതികരണത്തിന് പ്രേക്ഷകരില്‍ നിന്ന് വലിയ കരഘോഷം ലഭിക്കുക മാത്രമല്ല, സാമൂഹ്യമാധ്യമങ്ങളില്‍ നടിക്ക് ധാരാളം പ്രശംസയും ലഭിച്ചു. സാഹചര്യം നടി നന്നായി കൈകാര്യം ചെയ്‌തെന്നാണ് പൊതുവെ അഭിപ്രായം. എന്നാല്‍ ഇത് അപകടമാണെന്ന് പറയുന്നവരുമുണ്ട്. സുരക്ഷാ പ്രശ്‌നങ്ങള്‍ സൃഷ്ടിക്കുമെന്നാണ് കാരണമായി ചൂണ്ടിക്കാട്ടുന്നത്. ഇത്തരം സാഹചര്യം സംഭവിച്ചതിന് പരിപാടിയുടെ സംഘാടകരെയാണ് അവര്‍ കുറ്റപ്പെടുത്തുന്നത്.
