ആലപ്പുഴ: ആഗസ്ത് 12-ന് പുന്നമടക്കായലില്‍ നടക്കുന്ന 69-ാമത് നെഹ്റു ട്രോഫി വള്ളംകളി കാണാന്‍ പ്രത്യേക സൗകര്യമൊരുക്കി കെഎസ്ആര്‍.ടിസി.യുടെ ബഡ്ജറ്റ് ടൂറിസം സെല്‍. വള്ളംകളിയുടെ ടിക്കറ്റ്, ചാര്‍ട്ടേഡ് ബസ് സര്‍വീസ് തുടങ്ങിയ സംവിധാനങ്ങളാണ് ഒരുക്കിയിട്ടുള്ളത്. ആലപ്പുഴ കെഎസ്ആര്‍ടിസി ബസ് സ്റ്റേഷനിലെത്തിയും 9846475874 എന്ന വാട്ട്സ് ആപ്പ് നമ്പറിലേക്ക് പേര്, ഏത് കാറ്റഗറിയിലുളള പാസാണ് ആവശ്യം, എത്ര പേര് എന്ന വിവരം മെസ്സേജ് ആയി അയച്ച് ഓണ്‍ലൈനായി പണമടച്ചും ടിക്കറ്റ് എടുക്കാം. 2022ല്‍ 1,75,100 രൂപയുടെ ടിക്കറ്റുകള്‍ കെഎസ്ആര്‍ടിസി വഴി വിറ്റഴിച്ചിരുന്നു. വിവരങ്ങള്‍ക്ക്: ആലപ്പുഴ – 9895505815, ചേര്‍ത്തല – 9846507307, ഹരിപ്പാട് – 9447278494, എടത്വ – 9846475874, മാവേലിക്കര – 9446313991, കായംകുളം – 9400441002, ചെങ്ങന്നൂര്‍ – 9846373247.
ആവേശപ്പെരുമ ഉണര്‍ത്തി നെഹ്റു ട്രോഫി വള്ളംകളി കമന്ററി മത്സരം
ആലപ്പുഴ: നെഹ്റു ട്രോഫി ജലമേളയുടെ ഫൈനല്‍ മത്സരങ്ങളുടെ ആവേശം ഒട്ടും ചോര്‍ന്നു പോകാതെ കമന്ററി അവതരിപ്പിച്ച് വിദ്യാര്‍ഥികള്‍. 69-ാമത് നെഹ്റു ട്രോഫി വള്ളംകളിയോടെ ഭാഗമായി പബ്ലിസിറ്റി കമ്മിറ്റി ഹൈസ്‌കൂള്‍, ഹയര്‍ സെക്കന്ററി വിദ്യാര്‍ഥികള്‍ക്കായി നടത്തിയ കമന്ററി മത്സരത്തി്ലാണ് ഫൈനല്‍ ആവേശം മുഴങ്ങിയത്. കഴിഞ്ഞ വര്‍ഷത്തെ ഫൈനലിന്റെ ദൃശ്യചാരുതയ്‌ക്കൊപ്പം നെഹ്റു ട്രോഫിയുടെ ചരിത്രം കൂടി അവതരിപ്പിച്ച് മത്സരാര്‍ഥികള്‍ മുന്നേറി. ആലപ്പുഴ നഗരസഭ ക്ഷേമകാര്യ സ്റ്റാന്‍ഡിങ് കമ്മിറ്റി അധ്യക്ഷനും പബ്ലിസിറ്റി കമ്മിറ്റി അംഗവുമായ നസീര്‍ പുന്നയ്‌ക്കല്‍ ഉദ്ഘാടനം ചെയ്തു.
എച്ച്എസ് വിഭാഗത്തില്‍ അറവുകാട് ഹയര്‍ സെക്കന്‍ഡറി സ്‌കൂളിലെ ഷാഹിം മഹ്മൂദ് ഒന്നാം സ്ഥാനവും കുട്ടമംഗലം എസ്എന്‍ഡിപി ഹയര്‍ സെക്കന്‍ഡറി സ്‌കൂളിലെ ആദിത്യന്‍ പ്രദീഷ് രണ്ടാം സ്ഥാനവും നേടി. ഹയര്‍സെക്കന്‍ഡറി വിഭാഗത്തില്‍ എടത്വ ലൂര്‍ദ് മാതാ സ്‌കൂളിലെ ഷേബ മരിയ ജോസ് ഒന്നാം സ്ഥാനം കരസ്ഥമാക്കി. പ്രൊഫ. ചെറിയാന്‍ അലക്‌സാണ്ടര്‍, ഷാജി ചേരമണ്‍, ഹരികുമാര്‍ വാലേത്ത് എന്നിവര്‍ വിധികര്‍ത്താക്കളായി.
പ്രതികരിക്കാൻ ഇവിടെ എഴുതുക: