ചെന്നൈ : ചന്ദ്രയാന് മൂന്ന് ഭൂമിയുടെ ഭ്രമണപഥം വിട്ടകന്ന് ചന്ദ്രനിലേക്കുള്ള യാത്ര തുടങ്ങി. ട്രാന്സ് ലൂണാര് ഇഞ്ചക്ഷന് വിജയകരമായി പൂര്ത്തിയാക്കി. അര്ധരാത്രി 12:15 ഓടെയാണ് പ്രൊപ്പല്ഷന് മൊഡ്യൂളിലെ ലാം എഞ്ചിന് പ്രവര്ത്തിപ്പിച്ച് പേടകത്തെ ചന്ദ്രനിലേക്ക് തിരിച്ചു വിട്ടെന്ന് ഇസ്രോ വൃത്തങ്ങള് അറിയിച്ചു.
ഭൂമിക്ക് ചുറ്റുമുള്ള ഭ്രമണപഥം അഞ്ചുതവണ ഉയര്ത്തിയതിനു ശേഷമാണ് പേടകം ട്രാന്സ് ലൂണാര് ട്രജക്ട്ടറിയിലേക്ക് ചന്ദ്രയാന് 3 പ്രവേശിച്ചത്. ചാന്ദ്ര ഭ്രമണപഥത്തിലേക്കുള്ള പ്രവേശനം ആണ് അടുത്ത നിര്ണ്ണായക ഘട്ടം. ഓഗസ്റ്റ് 5നായിരിക്കും ഇത്. ഇതിനായി നാല് ലക്ഷം കിലോമീറ്ററോളം ദൂരമാണ് പേടകം ചന്ദ്ര ഭ്രമണപഥത്തില് എത്താന് സഞ്ചരിക്കേണ്ടത്. ചാന്ദ്ര ഭ്രമണപഥത്തില് പ്രവേശിച്ച ശേഷം ഘട്ടം ഘട്ടമായി പേടകവും ചന്ദ്രനും തമ്മിലുള്ള അകലം കുറയും. ചന്ദ്രനില് നിന്ന് നൂറ് കിലോമീറ്റര് അകലത്തിലുള്ള വൃത്താകൃതിയിലുള്ള ഭ്രമണപഥത്തിലെത്തിക്കഴിഞ്ഞാല് പ്രൊപ്പല്ഷന് മൊഡ്യൂളും ലാന്ഡറും തമ്മില് വേര്പ്പെടും. ആഗസ്റ്റ് 17നായിരിക്കും ഇത് നടക്കുക.
ആഗസ്റ്റ് 23ന് വൈകിട്ട് 5.47ന് ചന്ദ്രയാന് ചന്ദ്രോപരിതലത്തില് സോഫ്റ്റ് ലാന്ഡിങ്ങ്. നടത്തുമെന്നാണ് പ്രതീക്ഷിക്കുന്നത്. ചന്ദ്രന്റെ ദക്ഷിണധ്രുവത്തില് മാന്സിനസ് യു ഗര്ത്തത്തിന് അടുത്താണ് ചന്ദ്രയാന് ലാന്ഡര് ഇറങ്ങാന് പോകുന്നത്. ലാന്ഡിങ്ങ് കഴിഞ്ഞാല് റോവര് പുറത്തേക്ക് വരും. ലാന്ഡറിലെ ശാസ്ത്ര ഉപകരണങ്ങള് പ്രവര്ത്തിച്ച് തുടങ്ങും. 14 ദിവസം നീളുന്ന ചന്ദ്രനിലെ പകല് നേരമാണ് ലാന്ഡറിന്റെയും റോവറിന്റെയും കാലാവധി. ഇത്രയും ദിവസം കൊണ്ട് ചന്ദ്രനില് നിന്നും പരമാവധി വിവരങ്ങള് കൈവരിക്കുകയാണ് പ്രധാന ലക്ഷ്യം.
