ശിവഗിരി : ശ്രീനാരായണ ഗുരുദേവന്റെ സന്ദേശങ്ങള്‍ ഭാരതത്തിന്റെ ഗ്രാമാന്തരങ്ങള്‍ തോറും എത്തിക്കുന്നതിനുള്ള കര്‍മ്മ പരിപാടികള്‍ ആവിഷ്ക്കരിക്കുമെന്ന് ശിവഗിരി മഠം പ്രസിഡന്‍റ് സച്ചിദാനന്ദ സ്വാമി പറഞ്ഞു. ശിവഗിരിയില്‍ രണ്ടാഴ്ചയായി തുടര്‍ന്നു വന്ന ഹ്രസ്വകാല പഠനകോഴ്സിന്റെ സമാപനക്ലാസ് നയിച്ചു സംസാരിക്കുകയായിരുന്നു സ്വാമി.
തെരഞ്ഞെടുക്കുന്ന യുവതീ യുവാക്കളെ ശിവഗിരിയില്‍ വച്ച് ഗുരുദേവ കൃതികള്‍, ഗുരുദേവ ചരിത്രം – ദര്‍ശനം – സമകാലീന സംഭവങ്ങള്‍ എന്നിവയെ ആധാരമാക്കി ആവശ്യമായ വിജ്ഞാനം നല്‍കി ധര്‍മ്മപ്രചാരകരായി സമൂഹത്തിലേക്കയക്കണമെന്നാണ് ഇത്തരം കോഴ്സിന്റെ ലക്ഷ്യമെന്നും സ്വാമി പറഞ്ഞു. അതിനുള്ള പദ്ധതികള്‍ ആവിഷ്കരിക്കും. അടുത്ത കോഴ്സ് ഗുരുദേവ ജയന്തിയ്‌ക്ക് മുമ്പായി നടത്തും.
ധര്‍മ്മസംഘം ട്രസ്ററ് ജനറല്‍ സെക്രട്ടറി സ്വാമി ശുഭാംഗാനന്ദ , ട്രഷറര്‍ സ്വാമി ശാരദാനന്ദ, സ്വാമി വിശാലാനന്ദ, സ്വാമി അനപേക്ഷാനന്ദ, ഗുരുധര്‍മ്മപ്രചരണസഭാ സെക്രട്ടറി സ്വാമി അസംഗാനന്ദ ഗിരി, മഠം പി.ആര്‍.ഒ. ഇ.എം. സോമനാഥന്‍ തുടങ്ങിയവര്‍ പ്രസംഗിച്ചു.
ചെമ്പഴന്തി വയല്‍വാരം വീട്ടില്‍ ഭക്തര്‍ക്ക് ജന്‍മനക്ഷത്ര ഗുരുപൂജ നടത്താം
ചെമ്പഴന്തി : ചിങ്ങപ്പുലരി മുതല്‍ ശ്രീനാരായണ ഗുരുദേവ വിശ്വാസികള്‍ക്ക് ഗുരുദേവന്റെ അവതാരഗൃഹം വയല്‍വാരം വീട്ടില്‍ ജന്‍മനക്ഷത്ര ഗുരുപൂജ നടത്താനുള്ള അവസരം കൈവരുന്നു. ഏതൊരാള്‍ക്കും തന്റെ ജന്‍മദിനത്തില്‍ നേരിട്ടെത്തിയോ മുന്‍കൂട്ടി ബു ക്ക് ചെയ്തോ പൂജ നിര്‍വ്വഹിക്കാം. നേരിട്ടെത്തുന്നവര്‍ക്ക് സംന്യാസി ശ്രേഷ്ഠരുടെ നേതൃത്വത്തില്‍ നടത്തുന്ന വിശേഷാല്‍ പൂജയിലും പ്രാര്‍ത്ഥനയിലും സംബന്ധിച്ച് ഗുരുപൂജാപ്രസാദം അന്നദാനത്തിന് ശേഷം മടങ്ങാനാവും. നേരില്‍ വരാന്‍ കഴിയാതെ പൂജ ബുക്ക് ചെയ്യുന്നവര്‍ പേരും വിലാസവും ജന്‍മ നക്ഷത്രവും അറിയിച്ചാല്‍ മതിയാകും. പൂജയ്‌ക്ക് ശേഷം അവര്‍ക്കുള്ള വിശേഷാല്‍ പ്രസാദം തപാല്‍ മുഖേന ലഭ്യമാകും. നേരില്‍ വരുന്നവര്‍ക്ക് കുടുംബാംഗങ്ങളേയും ഒപ്പം കൂട്ടാനാവും. താമസ ഭക്ഷണ ക്രമീകരണം ഗുരുകുലത്തില്‍ സൗജന്യമായി ലഭിക്കും. വിവരങ്ങള്‍ക്ക് : സെക്രട്ടറി, ശ്രീനാരായണഗുരുകുലം, ചെമ്പഴന്തി പി.ഒ., തിരുവനന്തപുരം എന്ന വിലാസത്തിലോ ഫോണ്‍ – 8281119121, 0471-2592721- ലോ വിവരം നല്‍കാനാവും.
