കണ്ണൂര്: മണിപ്പൂര് സംഘര്ഷവുമായി ബന്ധപ്പെട്ട് ഫെയ്സ്ബുക്ക് പേജില് ആര്എസ്എസിനെതിരെ അപകീര്ത്തിപരവും സമൂഹത്തില് സ്പര്ദ്ധവളര്ത്തി കലാപാഹ്വാനം നല്കുന്നതുമായ പോസ്റ്റ് പ്രസിദ്ധീകരിച്ചതിനെതിരെ സിപിഎം നേതാവും മുന്മന്ത്രിയും എംഎല്എയുമായ കെ.കെ. ശൈലജക്കെതിരെ ആര്എസ്എസ് ആര്എസ്എസ് ജില്ലാ കാര്യവാഹ് കെ. ശ്രീജേഷ് കണ്ണൂര് സിറ്റി പോലീസ് മേധാവിക്ക് പരാതി നല്കി. മണിപ്പൂരില്പെണ്കുട്ടികളെ ആള്ക്കൂട്ടം വിവസ്ത്രയാക്കി തെരുവിലൂടെ നടത്തിച്ചത് സംഭവുമായി യാതൊരു ബന്ധവുമില്ലാത്ത ആര്എസ്എസിനെതിരെ ആരോപണം ഉന്നയിച്ചത് പ്രസ്ഥാനത്തെ സമൂഹത്തില് താറടിക്കാനാണെന്ന് പരാതിയില് പറയുന്നു.
മണിപ്പൂര് സംഭവത്തില് യഥാര്ത്ഥ പ്രതികളെ പോലീസ് അറസ്റ്റ് ചെയ്ത വിവരവും അവരുടെ ചിത്രങ്ങള് പേര് സഹിതം മാധ്യമങ്ങളിലൂടെ പുറത്തുവന്നതിനുശേഷവും ജനങ്ങളില് തെറ്റിദ്ധാരണ ഉളവാക്കി വിദ്വേഷവും കലാപവും സൃഷ്ടിക്കാന്വേണ്ടിയാണ് മനഃപൂര്വ്വം ശൈലജ ഇത്തരത്തില് പരസ്യപ്രസ്താവന നടത്തിയത്. ആര്എസ്എസിനെ ചേര്ത്തേഴുതിയതുമൂലം കേരളത്തില് പ്രവര്ത്തകര്ക്കെതിരെ നവമാധ്യമങ്ങളിലൂടെ അധിക്ഷേപവര്ഷം തുടങ്ങിയിരിക്കുകയാണ്.
ശൈലജയുടെ പ്രസ്താവനമൂലം ആര്എസ്എസ് പ്രവര്ത്തകര്ക്കും നേതാക്കള്ക്കുമെതിരെ സിപിഎമ്മുകാരും മുസ്ലീം തീവ്രവാദസംഘടനകളും അപവാദപ്രചരണവും കലാപാഹ്വാനവും നടത്തുകയാണ്. ആര്എസ്എസിനെതിരെ അപകീര്ത്തി ഉണ്ടാക്കുകയും അതുവഴി കേരളത്തില് സാമൂഹിക കലാപം സൃഷ്ടിക്കുവാന് ശ്രമിച്ചതിനും ശൈലജക്കെതിരെ കേസെടുക്കണമെന്നാവശ്യപ്പെട്ട് നല്കിയ പരാതിയുടെ കോപ്പി ഡിജിപി, ഡിഐജി, തലശ്ശേരി അസിസ്റ്റന്റ് കമ്മീഷണര്, എസ്എച്ച്ഒ എന്നിവര്ക്കും നല്കിയിട്ടുണ്ട്.
