ദുബായ്: ഐസിസി ടെസ്റ്റ് ബാറ്റിങ് റാങ്കിങ്ങില്‍ ഒരിടവേളയ്‌ക്കുശേഷം ഇന്ത്യന്‍ നായകന്‍ രോഹിത് ശര്‍മ ആദ്യ പത്തില്‍ തിരിച്ചെത്തി. വെസ്റ്റ് ഇന്‍ഡീസിനെതിരായ ആദ്യ ടെസ്റ്റിലെ സെഞ്ചുറിയാണ് രോഹിത്തിനെ വീണ്ടും ആദ്യ പത്തില്‍ എത്തിച്ചത്. പുതിയ റാങ്കിങ്ങില്‍ പത്താം സ്ഥാനത്താണ് രോഹിത്.
വെസ്റ്റ് ഇന്‍ഡീസിനെതിരായ അരങ്ങേറ്റ ടെസ്റ്റില്‍ തകര്‍പ്പന്‍ സെഞ്ചുറി നേടിയ ഇന്ത്യയുടെ ഓപ്പണര്‍ യശസ്വി ജയ്സ്വാള്‍ ടെസ്റ്റ് റാങ്കിങ്ങില്‍ അരങ്ങേറി. വിന്‍ഡസിനെതിരെ 171 റണ്‍സ് അടിച്ച ജയ്സ്വാള്‍ 73-ാം സ്ഥാനത്താണ്. കാര്‍ അപകടത്തില്‍ പരിക്കേറ്റ് ദീര്‍ഘനാളായി ക്രിക്കറ്റില്‍ നിന്ന് വിട്ടുനില്‍ക്കുന്ന റിഷഭ് പന്ത് പതിനൊന്നാം സ്ഥാനത്തേക്ക് ഇറങ്ങി. വിന്‍ഡീസിനെതിരായ ആദ്യ ടെസ്റ്റില്‍ അര്‍ധസെഞ്ചുറി നേടിയ വിരാട് കോഹ്‌ലി പുതിയ റാങ്കിങ്ങില്‍ പതിനാലാം സ്ഥാനത്താണ്. ബാറ്റര്‍മാരുടെ റാങ്കിങ്ങില്‍ ന്യൂസിലാന്‍ഡിന്റെ കെയ്ന്‍ വില്യംസണാണ് ഒന്നാമത്. ഓസ്‌ട്രേലിയയുടെ ട്രാവിസ് ഹെഡ് രണ്ടാമതും പാകിസ്ഥാന്റെ ബാബര്‍ അസം മൂന്നാമതുമാണ്.
ബൗളര്‍മാരുടെ റാങ്കിങ്ങില്‍ ഇന്ത്യന്‍ സ്പിന്നര്‍ ആര്‍. അശ്വിന്‍ തന്നെയാണ് ഒന്നാമത്. വിന്‍ഡീസിനെതിരായ ആദ്യ ടെസ്റ്റിലെ 12 വിക്കറ്റ് പ്രകടനത്തോടെ ഒന്നാം സ്ഥാനത്ത് ലീഡ് വര്‍ധിപ്പിച്ചു. ആദ്യ ടെസ്റ്റിലെ പ്രകടനത്തോടെ 24 റേറ്റിങ് പോയിന്റ് സ്വന്തമാക്കിയ അശ്വിന്‍ രണ്ടാം സ്ഥാനത്തുള്ള ഓസീസ് നായകന്‍ പാറ്റ് കമിന്‍സിനെക്കാള്‍ 56 റേറ്റിങ് പോയിന്റ് മുന്നിലാണിപ്പോള്‍. ദക്ഷിണാഫ്രിക്കയുടെ റബാദയാണ് മൂന്നാമത്. വിന്‍ഡീസിനെതിരായ ആദ്യ ടെസ്റ്റില്‍ അഞ്ച് വിക്കറ്റെടുത്ത രവീന്ദ്ര ജഡേജ മൂന്ന് സ്ഥാനങ്ങള്‍ മെച്ചപ്പെടുത്തി ഏഴാം സ്ഥാനത്തേക്ക് ഉയര്‍ന്നു. ജസ്പ്രീത് ബുംറ പത്താം സ്ഥാനത്താണ്. ഓള്‍റൗണ്ടര്‍മാരില്‍ ഒന്നും രണ്ടും സ്ഥാനങ്ങള്‍ രവീന്ദ്ര ജഡേജയും ആര്‍. അശ്വിനും നിലനിര്‍ത്തി. ബംഗ്ലാദേശിന്‍െ ഷാക്കിബ് അല്‍ ഹസ്സനാണ് മൂന്നാമത്. ഇന്ത്യന്‍ താരം അക്‌സര്‍ പട്ടേല്‍ അഞ്ചാമത്.
