തിരുവനന്തപുരം: വര്ക്കലയില് വിവാഹദിവസം അച്ഛന് കൊല്ലപ്പെട്ട ശ്രീലക്ഷ്മി വിവാഹിതയായി. ശിവഗിരി അമ്പലത്തില് വെച്ചായിരുന്നു വിവാഹം. വിനുവാണ് വരന്.അച്ഛന്റെ കൈപിടിച്ച് വിവാഹിതയാകാന് കൊതിച്ച ശ്രീലക്ഷ്മിയ്ക്ക് അച്ഛന്റെ ചിത്രത്തിനു മുന്പില് കണ്ണീരോടെ പ്രാര്ത്ഥിച്ച് ഇറങ്ങാനാണ് സാധിച്ചത്.
ജൂണ് 28നാണ് ശ്രീലക്ഷ്മിയുടെ വിവാഹം നടത്താനിരുന്നത്. മകളുടെ വിവാഹ ദിനത്തിലാണ് തിരുവനന്തപുരം കല്ലമ്പലത്ത് വടശ്ശേരിക്കോണം വലിയവിളാകത്ത് ശ്രീലക്ഷ്മിയില് രാജന് (62 ) കൊല്ലപ്പെട്ടത്. വിവാഹാഭ്യര്ത്ഥന നിരസിച്ചതിനെ തുടര്ന്ന് നാട്ടുകാരനായ യുവാവും സംഘവുമാണ് രാജുവിനെ ആക്രമിച്ച് കൊലപ്പെടുത്തിയത്.
അക്രമികള് ലക്ഷ്യം വെച്ചത് ശ്രീലക്ഷ്മിയെയാണെന്നും ആദ്യം ആക്രമിക്കാന് ശ്രമിച്ചുവെന്നും ബന്ധുക്കള് പറഞ്ഞിരുന്നു. തടയാന് ചെന്നപ്പോഴാണ് ശ്രീലക്ഷ്മിയുടെ അച്ഛന് രാജുവിന് അടിയേറ്റത്. അക്രമികള് ആശുപത്രി വരെ പിന്തുടര്ന്നുവെന്നും മരിച്ചു എന്നറിഞ്ഞപ്പോള് രക്ഷപ്പെട്ടുവെന്നും ശ്രീലക്ഷ്മിയുടെ ബന്ധുക്കള് വ്യക്തമാക്കിയിരുന്നു.
കൊല്ലപ്പെട്ട രാജു ഗള്ഫില് നിന്ന് മടങ്ങി വന്ന ശേഷം നാട്ടില് ഓട്ടോ ഡ്രൈവറായി ജോലി ചെയ്യുകയായിരുന്നു. മകളുടെ വിവാഹത്തിനായി പ്രതി സമീപിച്ചെങ്കിലും രാജു വിസമ്മതിക്കുകയായിരുന്നു. ഇതിനെ തുടര്ന്നുള്ള വൈരാഗ്യമാണ് കൊലപാതകത്തിലേക്ക് നയിച്ചത്. സംഭവുമായി ബന്ധപ്പെട്ട് വടശ്ശേരിക്കോണം സ്വദേശിയായ ജിഷ്ണു, ജിജിന്, ശ്യം, മനു എന്നിവരുള്പ്പെട്ട നാല് പേരെയാണ് വര്ക്കല പൊലീസ് കസ്റ്റഡിയിലെടുത്തത്.
