കോട്ടയം: മൊബൈല്‍ മോഷണക്കേസില്‍ ജാര്‍ഖണ്ഡ് സ്വദേശിയെ പോലീസ് അറസ്റ്റ് ചെയ്തു. ജാര്‍ഖണ്ഡ് സ്വദേശിയായ ഗോപിന്ദ് സിംഗ് (34) എന്നയാളെയാണ് കോട്ടയം ഈസ്റ്റ് പോലീസ് അറസ്റ്റ് ചെയ്തത്. ഇയാള്‍ ഇന്നലെ വൈകിട്ട് ആറുമണിയോടുകൂടി പോലീസ് പരേഡ് ഗ്രൗണ്ടിന് സമീപമുള്ള ഗുഡ് ഷെപ്പേര്‍ഡ് പള്ളിയില്‍ പ്രാര്‍ത്ഥനയ്‌ക്കായി എത്തിയ പെണ്‍കുട്ടിയുടെ മൊബൈല്‍ ഫോണ്‍ മോഷ്ടിച്ച് കടന്നുകളയുകയായിരുന്നു.
കുര്‍ബാനയ്‌ക്ക് പങ്കെടുക്കാന്‍ എത്തിയ പെണ്‍കുട്ടി പ്രാര്‍ത്ഥിക്കുന്നതിന് സമീപം ഇരുന്ന ഡെസ്‌കില്‍ മൊബൈല്‍ ഫോണ്‍ വച്ചതിനുശേഷം പ്രാര്‍ത്ഥിക്കുന്നതിനിടയില്‍ ഇയാള്‍ പിന്നില്‍ നിന്നും മൊബൈല്‍ ഫോണ്‍ മോഷ്ടിച്ച് കടന്നുകളയുകയായിരുന്നു. പരാതിയെ തുടര്‍ന്ന് കോട്ടയം ഈസ്റ്റ് പോലീസ് കേസ് രജിസ്റ്റര്‍ ചെയ്യുകയും ശാസ്ത്രീയമായ പരിശോധനയിലൂടെ മോഷ്ടാവിനെ കണ്ടെത്തി പിടികൂടുകയുമായിരുന്നു.
കോട്ടയം ഈസ്റ്റ് സ്റ്റേഷന്‍ എസ്‌ഐ അനുരാജ്, സുരേഷ് കുമാര്‍, സിപിഒമാരായ അജേഷ്, അനൂപ് കുമാര്‍ എന്നിവര്‍ ചേര്‍ന്നാണ് ഇയാളെ അറസ്റ്റ് ചെയ്തത്.
