കണ്ണൂര് : ദേശീയ പാതയില് സ്വകാര്യ ടൂറിസ്റ്റ് ബസ്സും മിനി കണ്ടെയ്നര് ലോറിയും കൂട്ടിയിടിച്ച് ബസ് യാത്രക്കാരന് മരിച്ചു 27 പേര്ക്ക് പരിക്കേറ്റിട്ടുണ്ട്. ഇതില് രണ്ട് പേര് ഗുരുതരാവസ്ഥയിലാണ്. ആന്ധ്ര രജിസ്ട്രേഷനിലുള്ള ലോറിയാണ് അപകടത്തില്പ്പെട്ടത്.
ചൊവ്വാഴ്ച പുലര്ച്ചെ 12.45 ഓടെ തോട്ട ടൗണിലാണ് അപകടം സംഭവിക്കുന്നത്. മണിപ്പാലില് നിന്നും പത്തനംതിട്ടയിലേക്ക് പോവുകയായിരുന്നു കല്ലട ട്രാവല്സിന്റെ ബസാണ് അപകടത്തില്പ്പെട്ടത്. തലശ്ശേരിയില് നിന്നും കണ്ണൂരിലേക്കായിരുന്നു മിനി ലോറി പോയിരുന്നത്. ഇടിയുടെ ആഘാതത്തില് ലോറി സമീപത്തെ കടയിലേക്ക് ഇടിച്ചുകയറി, കട തകര്ന്നു. റോഡ് ഗതാഗതം തടസപ്പെട്ടതിനെ തുടര്ന്ന് പ്രദേശത്തെ ഗതാഗതവും തടസ്സപ്പെട്ടു. ഫയര്ഫോഴ്സും പോലീസും സ്ഥലത്ത് എത്തി ക്രെയിന് ഉപയോഗിച്ച് ബസ് റോഡില് നിന്ന് മാറ്റിയതിന് ശേഷമാണ് ഗതാഗതം പുനസ്ഥാപിക്കാനായത്.
ബസിന്റെ അമിത വേഗതയാണ് അപകടത്തിന് കാരണമെന്നാണ് യാത്രക്കാര് പറയുന്നത്. അതേസമയം അപകടത്തില് മരിച്ചയാളുടെ തല വേര്പ്പെട്ട നിലയിലാണ് ആളെ തിരിച്ചറിയാനായിട്ടില്ല. മൃതദേഹം കണ്ണൂര് ജില്ലാ ആശുപത്രിയില് സൂക്ഷിച്ചിരിക്കുകയാണ്.
