മുംബൈ : അദാനി ഗ്രൂപ്പിന്റെ തൂക്കുപാലം മോഷണം പോയി. മുംബൈ മലാഡ് ഓവ് ചാലിന് കുറുകെയുണ്ടായിരുന്ന ആറായിരം കിലോ തൂക്കമുണ്ടായിരുന്ന ഇരുമ്പ് പാലമാണ് മോഷണം പോയത്. അദാനി ഇലക്ട്രിസിറ്റി ഓഫീസില് കേബിളുകളും മറ്റ് ഉപകരണങ്ങളും കൊണ്ട് പോകാന് ഉപയോഗിച്ചിരുന്ന പാലമായിരുന്നു ഇത്. ലക്ഷങ്ങളോളം വില വരുന്ന ഇരുമ്പും, സ്റ്റീലും ഉപയോഗിച്ചാണ് പാലം നിര്മിച്ചത്. അദാനി ഗ്രൂപ്പ് പരാതി നല്കിയതോടെയാണ് സംഭവം പുറത്തറിയുന്നത്.
കഴിഞ്ഞ ജൂണ് 26നാണ് സംഭവം. അദാനി ഗ്രൂപ്പ് സാധനങ്ങള് കൊണ്ടുപോകുന്നതിനായി താത്കാലികമായി ഉപയോഗിച്ചിരുന്നതാണ് ഈ പാലം. എന്നാല് ഏപ്രില് മാസത്തില് പുതിയ പാലം സ്ഥാപിച്ചതിന് പിന്നാലെ ഇത് ക്രെയിന് ഉപയോഗിച്ച് മറ്റൊരിടത്ത് വച്ചിരിക്കുകയായിരുന്നു. അവിടെ നിന്നും മോഷ്ടാക്കള് ഗ്യാസ് കട്ടറുകള് ഉപയോഗിച്ച് ചെറു കഷ്ണങ്ങളായി മുറിച്ച് പാലം കടത്തുകയായിരുന്നു.
പാലം ജൂണ് ആറിനായിരുന്നു അവസാനമായി കണ്ടത്. പാലം നിര്മിക്കാനായി കരാര് കൊടുത്തിരുന്ന സ്ഥാപനത്തിലെ തൊഴിലാളിയും സഹായികളുമാണ് നിലവില് അറസ്റ്റിലായിട്ടുള്ളത്. പാലം സ്ഥാപിച്ചിരുന്ന മേഖലയില് സിസിടിവികള് ഇല്ലാതിരുന്ന ധൈര്യത്തിലായിരുന്നു മോഷണം. എന്നാല് മേഖലയിലെ സര്വൈലന്സ് ക്യാമറകള് പരിശോധിച്ച് പോലീസ് മോഷ്ടാക്കളെ പിടികൂടുകയായിരുന്നു.
പാലത്തിന് അടുത്തേക്ക് വലിയ വാഹനത്തിലെത്തിയ ശേഷം മോഷ്ടാക്കള് ഗ്യാസ് കട്ടര് ഉപയോഗിച്ച് പാലം മുറിച്ച ശേഷം അഴിച്ചുകൊണ്ടുപോവുകയായിരുന്നു. സര്വൈലന്സ് ക്യാമറയില് ഈ വാഹനത്തിന്റെ നമ്പര് പതിഞ്ഞതാണ് വഴിത്തിരിവായത്. മുറിച്ച് മാറ്റിയ പാലവും പോലീസ് കണ്ടെടുത്തിട്ടുണ്ട്.
