ചെന്നൈ : മദ്യപിച്ച് ഔദ്യോഗിക വാഹനം ഇടിപ്പിച്ച് അപകടമുണ്ടാക്കിയ രണ്ട് പോലീസുകാര് പിടിയില്. വെള്ളിയാഴ്ച തമിഴ്നാട് റാണിപ്പെട്ട് ജില്ലയിലാണ് സംഭവം. കോണ്സ്റ്റബിള്മാരായ ശ്രീധര് അരുള്മണി എന്നിവര് മദ്യലഹരിയില് ഔദ്യോഗിക വാഹനം ഓടിച്ച് അശോക് നഗറിലെ, റോഡരികില് നിര്ത്തിയിട്ടിരുന്ന അഞ്ച് ടൂ വീലറും ഒരു കാറുമാണ് ഇടിച്ചുതെറിപ്പിക്കുകയായിരുന്നു.
തമിഴ്നാട് പൊലീസിന്റെ ഔദ്യോഗിക എസ്യുവി വാഹനത്തിലാണ് സഞ്ചരിച്ചിരുന്നത്. വിരുഗമ്പാക്കത്തെ തൈഷ അപ്പാര്ട്ട്മെന്റ് കോംപ്ലക്സില് നിന്ന് അഭിരാമപുരത്തെ തമിഴ്നാട് കമാന്ഡോ ഫോഴ്സ് സ്കൂളിലേക്കുള്ള യാത്രയ്ക്കിടെ ഇരുവരും മദ്യപിക്കുകയായിരുന്നു. തുടര്ന്ന് വാഹനം ഓടിച്ചിരുന്ന ശ്രീധറിന് വാഹനത്തിന്റെ നിയന്ത്രണം നഷ്ടമാവുകയും റോഡരികില് നിര്ത്തിയിട്ടിരുന്ന ബൈക്കും സൈക്കിളും കാറും ഇടിച്ച് തെറിപ്പിക്കുകയുമായിരുന്നു. സംഭവത്തില് ആര്ക്കും പരിക്കേറ്റിട്ടില്ല.
തുടര്ന്ന് നടത്തിയ പരിശോധനയില് ഇരുവരും മദ്യപിച്ചിരുന്നതായി കണ്ടെത്തുകയും കസ്റ്റഡിയില് എടുക്കുകയുമായിരുന്നു. ഇരുവര്ക്കുമെതിരെ വകുപ്പുതല അന്വേഷണവും ആരംഭിച്ചിട്ടുണ്ട്.
