ധാക്ക: പെട്ടെന്നുള്ള പ്രഖ്യാപനത്തിലൂടെ തമീം ഇഖ്ബാല് വിരമിച്ച ബംഗ്ലാദേശ് ക്രിക്കറ്റിന് പുതിയ നായകന്. ലിറ്റന് ദാസ് ആണ് ഇനി നയിക്കുക. അടിയന്തര സാഹചര്യം കണക്കിലെടുത്ത് ഇന്നലെതന്നെ ബംഗ്ലാദേശ് ക്രിക്കറ്റ് ബോര്ഡ്(ബിസിബി) പുതിയ ക്യാപ്റ്റനെ പ്രഖ്യാപിക്കുകയായിരുന്നു.
നിലവില് നാട്ടില് നടന്നുകൊണ്ടിരിക്കുന്ന അഫ്ഗാനിസ്ഥാനെതിരായ ഏകദിന പരമ്പരയില് ശേഷിക്കുന്ന മത്സരങ്ങളിലും ലിറ്റന് ദാസ് നയിക്കും. ഇന്നാണ് പരമ്പരയിലെ രണ്ടാം ഏകദിനം.
ആദ്യ ഏകദിനത്തില് ടീം 17 റണ്സിന്റെ ഞെട്ടിക്കുന്ന തോല്വി വഴങ്ങിയിരുന്നു. ഇതിന് പിന്നാലെ വിമര്ശനങ്ങള് ഉയര്ന്നുവരും മുമ്പേ തന്നെ നായകന് തമീം ഇഖ്ബാല് വളരെ വേഗത്തില് വിരമിക്കല് പ്രഖ്യാപനം നടത്തുകയായിരുന്നു. ലോക ക്രിക്കറ്റിനെ തന്നെ ഞെട്ടിക്കുന്ന സംഭവമായിരുന്നു അത്. വികാരാധീനനായാണ് തമീം വിരമിക്കല് പ്രഖ്യാപിച്ചത്. താരത്തിന്റെ വാര്ത്താ സമ്മേളനത്തിന് ശേഷമാണ് ബിസിബിയില് നിന്നും വിമര്ശനങ്ങളുയര്ന്നത്.
അഫ്ഗാന്റെ ബംഗ്ലാദേശ് പര്യടനത്തിലെ ഏക ടെസ്റ്റില് ബംഗ്ലാദേശിന് റെക്കോഡ് ജയം നേടിക്കൊടുത്തതില് ലിറ്റന് ദാസിന്റെ പ്രകടനമികവ് നിര്ണായകമായിരുന്നു. കഴിഞ്ഞ മാസം നടന്ന ആ ടെസ്റ്റില് ബംഗ്ലാദേശ് 546 റണ്സിന്റെ വിജയമാണ് നേടിയത്. ഏകദിന പരമ്പരയില് ഇന്ന് നടക്കുന്ന മത്സരത്തോടെ അഫ്ഗാനുമായി സമനില പിടിക്കാനാണ് ബംഗ്ലാദേശിന്റെ ചടുല നീക്കം. നിലവില് 1-0ന് അഫ്ഗാനാണ് മുന്നില്. പരമ്പരയിലെ മൂന്നാം മത്സരം 11നാണ്. ഈ മാസം 14, 16 തീയതികളിലായി രണ്ട് മത്സര ട്വന്റി20 പരമ്പരയും അഫ്ഗാന്റെ ബംഗ്ലാദേശ് പര്യടനത്തിലുണ്ട്.
