തിരുവനന്തപുരം: തെരുവു നായ്ക്കളുടെ ആക്രമണത്തെത്തുടര്ന്ന് മരിച്ച കണ്ണൂര് മുഴപ്പിലങ്ങാട്ടെ നിഹാല് നൗഷാദ് എന്ന കുട്ടിയുടെ കുടുംബത്തിന് മുഖ്യമന്ത്രിയുടെ ദുരിതാശ്വാസ നിധിയില് നിന്ന് 10 ലക്ഷം രൂപ അനുവദിക്കാന് തീരുമാനിച്ചു. ഈ മാസം 11നാണ് നിഹാല് തെരുവുനായ ആക്രമണത്തില് മരിച്ചത്. നിഹാലിന്റെ പിതാവ് നൗഷാദ് ബഹറൈനില് ജോലി ചെയ്യുകയാണ്.
സംസാരശേഷിയില്ലാത്ത കുട്ടിയായിരുന്നു നിഹാല്. വൈകീട്ട് അഞ്ച് മണിയോടെ കാണാതായ കുട്ടിയെ പൊലീസും നാട്ടുകാരും കണ്ടെത്തുമ്പോള് രക്തം വാര്ന്ന് അനക്കമില്ലാത്ത നിലയിലായിരുന്നു.
ചികിത്സാസഹായം
മലപ്പുറം ഏറനാട് താലൂക്കില് അറയിലകത്ത് വീട്ടില് ഹാറൂണിന്റെ മകന് ഷഹീന് ചികിത്സക്കായി മരുന്ന് വാങ്ങിയ ഇനത്തില് ചെലവായ 67,069 രൂപ മുഖ്യമന്ത്രിയുടെ ദുരിതാശ്വാസ നിധിയില് നിന്ന് റീ ഇംബേഴ്സ് ചെയ്ത് നല്കും. സവിശേഷമായ സന്ധിവാത രോഗം ബാധിച്ച് ചികിത്സയില് കഴിയുന്ന ഷഹീന്റെ തുടര് ചികിത്സ സംബന്ധിച്ച നടപടികള് സ്വീകരിക്കുവാന് ആരോഗ്യ കുടുംബക്ഷേമ വകുപ്പിനെ ചുമതലപ്പെടുത്തി.
