പുല്പ്പള്ളി: സര്വീസ് സഹകരണ ബാങ്ക് വായ്പ തട്ടിപ്പ് കേസില് കോണ്ഗ്രസ് ബത്തേരി മണ്ഡലം പ്രസിഡന്റ് വി.എം. പൗലോസുകുട്ടി റിമാന്ഡില്. ബത്തേരി ജുഡീഷ്യല് മജിസ്ട്രേറ്റ് കോടതിയാണ് ബാങ്ക് മുന് ഡയറക്ടറുമായ പൗലോസുകുട്ടിയെ പതിനാല് ദിവസത്തേക്ക് റിമാന്ഡ് ചെയ്തത്. ഞായറാഴ്ച്ച ആലൂര്ക്കുന്നിലെ വീട്ടില്നിന്നു കസ്റ്റഡിയിലെടുത്ത പൗലോസുകുട്ടിയുടെ അറസ്റ്റ് വൈകുന്നേരത്തോടെ രേഖപ്പെടുത്തി ഇന്നലെയാണ് കോടതിയില് ഹാജരാക്കിയത്.
വ്യാജരേഖകള് ചമച്ച് തങ്ങളുടെ പേരില് ലക്ഷക്കണക്കിനു രൂപ വായ്പയെടുത്തെന്ന കേളക്കവല പറമ്പക്കാട്ട് ഡാനിയേല്, സാറാക്കുട്ടി ദമ്പതികളുടെ പരാതിയില് കഴിഞ്ഞ ഒക്ടോബറില് രജിസ്റ്റര് ചെയ്ത കേസിലാണ് അറസ്റ്റ്. ഇതേ കേസിലെ മറ്റ് പ്രതികളായ ബാങ്ക് മുന് പ്രസിഡന്റും രാജിവച്ച കെപിസിസി ജനറല് സെക്ട്രട്ടറിയുമായ കെ.കെ. അബ്രഹാം, ബാങ്ക് മുന് സെക്രട്ടറി കെ.ടി. രമാദേവി എന്നിവര് ജില്ലാ ജയിലില് റിമാന്ഡിലാണ്.
കെ.കെ. അബ്രഹാമിനും രമാദേവിക്കും പുറമേ പുല്പ്പള്ളിയിലെ കരാറുകാരന് കൊല്ലപ്പള്ളി സജീവനെയുമാണ് ആദ്യം പ്രതിചേര്ത്തത്. പിന്നീട് പൗലോസുകുട്ടിയെയും പ്രതിയാക്കുകയായിരുന്നു. ദമ്പതികള്ക്കു അവരറിയാതെ വായ്പ അനുവദിക്കുന്നതിനു ശിപാര്ശ ചെയ്തതും പണയവസ്തുവിന്റെ മൂല്യനിര്ണം നടത്തിയതും പൗലോസുകുട്ടിയാണെന്നാണ് പോലീസിന്റെ കണ്ടെത്തല്.
ബാങ്ക് വായ്പ ഇടപാടുമായി ബന്ധപ്പെട്ട് പൗലോസുകുട്ടിക്കെതിരേ സഹോദരന്റെ ഭാര്യ ദീപയും പോലീസില് പരാതി നല്കിയിരുന്നു. ഭര്ത്താവ് ഷാജിയുടെ പേരില് വായ്പയെടുത്തു കബളിപ്പിച്ചുവെന്നായിരുന്നു ദീപയുടെ പരാതി.
ഇതുമായി ബന്ധപ്പെട്ട കേസില് പൗലോസുകുട്ടിക്ക് ജില്ലാ കോടതി കഴിഞ്ഞ ദിവസം മുന്കൂര് ജാമ്യം അനുവദിച്ചിരുന്നു. ഇതിനു പിന്നാലെയാണ് ഡാനിയേല് ദമ്പതികളുടെ പരാതിപ്രകാരമുള്ള കേസില് അറസ്റ്റുചെയ്തത്. ഡാനിയേല് ദമ്പതികളുടെ പരാതിയിലുള്ള കേസില് കെ.കെ. അബ്രഹാമിന്റെ ജാമ്യപേക്ഷ ഹൈക്കോടതി ഇന്നലെ പഗിഗണിച്ച ശേഷം വെള്ളിയാഴ്ച്ചത്തേക്കു മാറ്റി.
