ചലച്ചിത്ര നടന് പൂജപ്പുര രവി അന്തരിച്ചതോടെ മലയാള സിനിമിയുടെ ഒരു കാലഘട്ടത്തിനാണ് അന്ത്യം സംഭവിച്ചത്. നാലായിരത്തോളം നാടകങ്ങളിലും എണ്ണൂറോളം സിനിമകളിലും അഭിനയിച്ച മലയാളത്തിലെ ശ്രദ്ധേയ നടനാണ് പൂജപ്പുര രവി. ഹാസ്യനടനായും സ്വഭാവനടനായും ദീര്ഘകാലം മലയാളസിനിമയില് അഭിനയിച്ചു. കള്ളന് കപ്പലില്തന്നെ, റൗഡി രാമു, ഓര്മകള് മരിക്കുമോ?, അമ്മിണി അമ്മാവന്, മുത്താരംകുന്ന് പിഒ, പൂച്ചയ്ക്കൊരു മൂക്കുത്തി, ലൗ ഇന് സിംഗപ്പൂര്, ആനയ്ക്കൊരുമ്മ, നന്ദി വീണ്ടും വരിക, മഴ പെയ്യുന്നു മദ്ദളം കൊട്ടുന്നു, കടത്തനാടന് അമ്പാടി, മഞ്ചാടിക്കുരു തുടങ്ങിയ സിനിമകളിലെ കഥാപാത്രങ്ങള് ഏറെ ശ്രദ്ധിക്കപ്പെട്ടു. 2016ല് പുറത്തിറങ്ങിയ ഗപ്പിയാണ് അവസാന ചിത്രം.
തിരുവനന്തപുരം പൂജപ്പുര സ്വദേശിയാണ്. എം.രവീന്ദ്രന് നായരെന്നാണ് യഥാര്ഥ പേര്. നാടക നടന് ആയിരിക്കെ കലാനിലയം കൃഷ്ണന് നായരാണ് അദ്ദേഹത്തിന്റെ പേര് മാറ്റിയത്. നാടകമേഖലയില് ധാരാളം രവിമാര് ഉള്ളതിനാല് പൂജപ്പുര എന്ന സ്ഥലപ്പേരുകൂടി ചേര്ക്കുകയായിരുന്നു അദ്ദേഹം. ഭാര്യ പരേതയായ തങ്കമ്മ കലാനിലയത്തില് നടി ആയിരുന്നു. മക്കള് ലക്ഷ്മി, ഹരികുമാര്.
ട്രാവന്കൂര് ഇന്ഫന്ട്രിയിലും സൈനിക സ്കൂളിലും ഉദ്യോഗസ്ഥനായിരുന്ന മാധവന്പിള്ളയുടെയും ഭവാനിയമ്മയുടെയും നാലുമക്കളില് മൂത്തയാളായിരുന്നു രവി. ചിന്നമ്മ മെമ്മോറിയല് ഗേള്സ് സ്കൂള്, തിരുമല ഹയര് സെക്കന്ഡറി സ്കൂള് എന്നിവിടങ്ങളില് പഠിച്ചു. ഏഴാം ക്ലാസ് വിദ്യാര്ഥിയായിരിക്കെ ആകാശവാണിയുടെ റേഡിയോ നാടകത്തില് അഭിനയിക്കാന് തെരഞ്ഞെടുക്കപ്പെട്ടതോടെയാണ് അഭിനയ രംഗത്തോട് താത്പര്യമുണ്ടാകുന്നത്. പിന്നീട് ആകാശവാണി ബാലലോകം നാടകങ്ങളില് സ്ഥിരം ശബ്ദസാന്നിധ്യമായി.
പതിനൊന്നാം ക്ലാസില് പഠിക്കുമ്പോള് എസ്.എല്. പുരം സദാനന്ദന്റെ ‘ഒരാള്കൂടി കള്ളനായി’ എന്ന നാടകത്തില് ശ്രദ്ധേയ കഥാപാത്രത്തെ അവതരിപ്പിച്ചു. അധ്യാപകരില്നിന്നുള്പ്പെടെ മികച്ച പ്രതികരണം ലഭിച്ചതോടെ അഭിനയം തന്റെ വഴിയായി അദ്ദേഹം തെരഞ്ഞെടുത്തു. നാടകങ്ങളില് ശ്രദ്ധേയമായ വേഷങ്ങള് അവതരിപ്പിക്കാന് സാധിച്ചതോടെ സിനിമ ലക്ഷ്യമാക്കി മദ്രാസിലേക്ക് ട്രെയിന് കയറി. വേലുത്തമ്പി ദളവ ഉള്പ്പെടെ ഏതാനും സിനിമകളില് മുഖം കാണിച്ചു.
സിനിമകളില് അവസരങ്ങള് ഇല്ലാതായതോടെ ഗണേഷ് ഇലക്ട്രിക്കല്സ് എന്ന കമ്പനിയില് ജോലിക്കാരനായി ചേര്ന്നു. പിന്നീട് ജഗതി എന്.കെ. ആചാരിയുടെ നിര്ദേശപ്രകാരം തിരികെ തിരുവനന്തപുരത്ത് എത്തിയ രവി കലാനിലയം നാടകവേദിയില് നടനായി. ഹാസ്യ വേഷങ്ങളില് തിളങ്ങി കലാനിലയത്തിന്റെ അവിഭാജ്യ ഘടകമായി മാറി. കായംകുളം കൊച്ചുണ്ണി, രക്തരക്ഷസ് തുടങ്ങിയ നാടകങ്ങളിലെ വേഷങ്ങള് ഏറെ ശ്രദ്ധിക്കപ്പെട്ടു. 10 വര്ഷത്തോളം കലാനിലയത്തില് നടനായി തുടര്ന്നു.
1976ല് ഹരിഹരന് സംവിധാനം ചെയ്ത അമ്മിണി അമ്മാവന് എന്ന സിനിമയില് ശ്രദ്ധേയ വേഷം അവതരിപ്പിക്കാന് സാധിച്ചതോടെ സിനിമയില് നിരവധി വേഷങ്ങള് തേടിയെത്തി. സത്യന്, നസീര്, മധു, ജയന് തുടങ്ങി മമ്മൂട്ടിയും മോഹന്ലാലും കഴിഞ്ഞ് പ്രിഥ്വിരാജും ടൊവീനോ തോമസും ഉള്പ്പെടെയുള്ള വിവിധ തലമുറകള്ക്കൊപ്പം അഞ്ചു പതിറ്റാണ്ടോളം അഭിനയരംഗത്ത് സജീവമായിരുന്നു അദ്ദേഹം.
ജോഷി, പ്രിയദര്ശന്, സിബി മലയില്, കമല്, വിനയന് തുടങ്ങിയ പ്രമുഖ സംവിധായകരുടെയെല്ലാം ആദ്യ സിനിമകളില് അഭിനയിച്ചു. പ്രിയദര്ശന്റെ നിരവധി സിനിമകളില് ശ്രദ്ധേയ വേഷങ്ങള് ചെയ്തു. സിനിമയില് അവതരിപ്പിച്ചവയില് പകുതിയിലധികവും ‘പട്ടര്’ കഥാപാത്രങ്ങളായിരുന്നു എന്നത് പൂജപ്പുര രവിക്ക് മാത്രം അവകാശപ്പെടാവുന്ന ഒരു അപൂര്വ സവിശേഷതയാണ്. സിനിമയില് അവസരങ്ങള് കുറഞ്ഞതോടെ മിനിസ്ക്രീനില് ശ്രദ്ധിച്ച അദ്ദേഹം നിരവധി ടി.വി. സീരിയലുകളില് വേഷമിട്ടു.
