ന്യൂദല്‍ഹി: നമ്മുടെ പ്രധാനമന്ത്രിക്ക ലോകത്തിന്റെ എല്ലാ കോണുകളില്‍ നിന്നും ബഹുമാനം ലഭിക്കുന്നതില്‍ വിലയം അഭിമാനമുണ്ടെന്ന് കോണ്‍ഗ്രസ് നേതാവ് സാം പിട്രോദ. ഔദ്യോഗിക സന്ദര്‍ശനത്തിനായി യുഎസിലേക്ക് പ്രധാനമന്ത്രി അടുത്ത ദിവസം പോകാനിരിക്കെയാണ് സാം പിത്രോദയുടെ പ്രതികരണം. ഇന്ത്യന്‍ ഓവര്‍സീസ് കോണ്‍ഗ്രസിന്റെ ചെയര്‍പേഴ്‌സണായ പിട്രോദ നിലവില്‍ കോണ്‍ഗ്രസ് നേതാവ് രാഹുല്‍ ഗാന്ധിയുടെ യുഎസ് പര്യടനത്തിന്റെ ഭാഗമാണ്.
റഷ്യ-യുക്രെയ്ന്‍ സംഘര്‍ഷത്തില്‍ ഇന്ത്യയുടെ നിലപാടിനെ പ്രശംസിച്ച് രാഹുല്‍ ഗാന്ധി രംഗത്തെത്തിയിരുന്നു. ഇതിനോടായിരുന്നു സാം പിട്രോദയുടെ പ്രതികരണം. ‘ ഇന്ത്യ എവിടയൊക്കെയാണ് ശരി ചെയ്യുന്നതെന്ന് രാഹുല്‍ ഗാന്ധിക്ക് നന്നായിട്ടറിയാം. കഴിഞ്ഞ ദിവസം ആരോ എന്നോട് പറഞ്ഞു, ഇന്ത്യന്‍ പ്രധാനമന്ത്രിക്ക് എല്ലായിടത്തും വലിയ സ്വീകരണമാണ് ലഭിക്കുന്നത് എന്ന്. എനിക്ക് അതില്‍ വലിയ സന്തോഷമുണ്ടെന്ന് ഞാന്‍ മറുപടി പറഞ്ഞു. കാരണം അദ്ദേഹം എന്റെ പ്രധാനമന്ത്രി കൂടിയാണ്. പക്ഷേ ഒരിടത്തും നമുക്ക് തെറ്റ് പറ്റരുത്. ഇന്ത്യയുടെ പ്രധാനമന്ത്രിയായത് കൊണ്ടാണ് അദ്ദേഹത്തിന് സ്വീകരണം ലഭിക്കുന്നത്. അല്ലാതെ അദ്ദേഹം ബിജെപിയുടെ പ്രധാനമന്ത്രിയായത് കൊണ്ടല്ല. ഈ രണ്ട് കാര്യങ്ങളിലും വ്യത്യാസമുണ്ട്.
150 കോടി ജനങ്ങളുള്ള ഒരു രാജ്യത്തിന്റെ പ്രധാനമന്ത്രി എല്ലായിടത്തും ബഹുമാനം അര്‍ഹിക്കുന്നുണ്ട്. ഞാന്‍ അതില്‍ വളരെയധികം അഭിമാനിക്കുന്നു. അക്കാര്യം ഞാന്‍ ഒരിക്കലും നിഷേധിക്കില്ല. രാഹുല്‍ ഗാന്ധിക്കും മികച്ച സ്വീകരണവും പ്രതികരണങ്ങളുമാണ് ലഭിക്കുന്നതെന്നും പിട്രോദ.
