ന്യൂദല്ഹി : ദല്ഹി മുന്ഉപമുഖ്യമന്ത്രി മനീഷ് സിസോദിയയ്ക്ക് ജാമ്യമില്ല. മദ്യനയക്കേസ് അഴിമതി കേസില് ജയിലില് കഴിയുന്ന സിസോദിയ നല്കിയ ജാമ്യ ഹര്ജി ദല്ഹി ഹൈക്കോടതി തള്ളി. ജസ്റ്റിസ് ദിനേശ് കുമാര് ശര്മ്മയാണ് ഹര്ജി പരിഗണിച്ചത്. ജാമ്യാപേക്ഷയില് വാദം കേട്ട കോടതി വിധി പുറപ്പെടുവിക്കാന് ചൊവ്വാഴ്ചത്തേയ്ക്ക് മാറ്റുകയായിരുന്നു.
സിസോദിയയ്ക്ക് എതിരായ എന്ഫോഴ്സ്മെന്റ് ഡയറക്ടറേറ്റിന്റെ ആരോപണങ്ങള് അതീവ ഗുരുതരമാണെന്ന് നിരീക്ഷിച്ച കോടതി ജാമ്യം നിരസിക്കുകയായിരുന്നു. ദല്ഹി എക്സൈസ് പോളിസി സംബന്ധിച്ച കാര്യങ്ങളിലേക്ക് കോടതി പോയിട്ടില്ല. ശക്തനായ വ്യക്തിയാണ് മനീഷ് സിസോദിയ. ഈ ഘട്ടത്തില് ജാമ്യം നല്കിയാല് സാക്ഷികളെ സ്വാധീനിക്കാന് കാരണമാവുമെന്നും നിരീക്ഷിച്ചാണ് സിസോദിയയുടെ ജാമ്യാപേക്ഷ തള്ളിയത്.
ഇഡി രജിസ്റ്റര് ചെയ്ത കേസില് മനീഷ് സിസോദിയ നിലവില് ജയിലിലാണ്. തുടര്ന്ന് ആരോഗ്യസ്ഥിതി മോശമാണെന്ന് ചൂണ്ടിക്കാണിച്ചാണ് സിസോദിയ ജാമ്യത്തിനായി കോതിയെ സമീപിച്ചത്. കീഴ്ക്കോടതി ജാമ്യം നിഷേധിച്ചതിനെ തുടര്ന്നാണ് ഹൈക്കോടതിയെ സമീപിച്ചത്.
