കോട്ടയം: കഴിഞ്ഞ ഏഴ് വർഷങ്ങൾ കേരളത്തിലെ ജനങ്ങൾക്ക് വറുതിയുടെ കാലഘട്ടമായിരുന്നുവെന്ന് ബിജെപി മധ്യമേഖല പ്രസിഡൻ്റ് എൻ. ഹരി. പെൻഷനും ശമ്പളവും മുടങ്ങി കെഎസ്ആർട്ടിസി ഉദ്യോഗസ്ഥരും കൃഷിക്കാരും ആത്മഹത്യ ചെയ്യേണ്ടിവന്ന വർഷങ്ങളായിരുന്നു കടന്നു പോയത്. മദ്യവർജ്ജന മാണ് ലക്ഷ്യമെന്ന് പറഞ്ഞു അധികാരത്തിലേറിയവർ ഏഴുവർഷം കൊണ്ട് തുറന്ന് കൊടുത്തത് നൂറുകണക്കിന് ബാറുകളും കള്ളു ഷാപ്പുകളുമാണെന്നും അദ്ദേഹം പറഞ്ഞു. ബിജെപി അയർകുന്നം മണ്ഡലം കമ്മിറ്റിയുടെ ആഭിമുഖ്യത്തിൽ രണ്ടാം പിണറായി സർക്കാരിന്റെ ജനവിരുദ്ധനയങ്ങൾക്കും അഴിമതിക്കുമെതിരെ സംഘടിപ്പിച്ച കുറ്റ വിചാരണസദസ് ഉദ്ഘാടനം ചെയ്ത് സംസാരിക്കുകയായിരുന്നു എൻ. ഹരി.
തീവ്രവാദത്തെ തുടച്ചുനീക്കുമെന്ന് അവകാശപ്പെട്ട പിണറായി സർക്കാരിനെ വെല്ലുവിളിച്ച് അവരുടെ തന്നെ നേതാക്കളുടെ തണലിൽ പോപ്പുലർ ഫ്രണ്ടും ക്യാമ്പസ് ഫ്രണ്ടും തഴച്ചു വളർന്ന് നിരവധി നിരപരാധികളെ അരിഞ്ഞു വീഴ്‌ത്തി കുടുംബങ്ങൾ അനാഥമാക്കി. അവർ രാജ്യത്തിനെതിരെ യുദ്ധം പ്രഖ്യാപിച്ചു. ഇടതുപക്ഷ സർക്കാർ അവരെ നിശബ്ദമായി സഹായിച്ചുകൊണ്ടിരുന്നു.
ആൾക്കൂട്ട ആക്രമണങ്ങളും കൊലപാതകങ്ങളും മയക്കു മരുന്ന് ഉപയോഗവും വിപണനവും സ്വർണ്ണ കള്ളക്കടത്തും പിണറായി വിജയൻ സർക്കാരിന് കീഴിൽ തഴച്ചു വളർന്നു. അട്ടപ്പാടിയിലും വയനാട്ടിലും മതിയായ ചികിത്സ കിട്ടാതെ മരിച്ച ആദിവാസി കുട്ടികളുടെയും അമ്മമാരുടെയും വിവരങ്ങൾ മറച്ചു വെച്ചും പട്ടിണി കിടന്ന് ഒടുവിൽ കത്തെഴുതി വെച്ച് ആത്മഹത്യ ചെയ്ത എട്ടാം ക്ലാസുകാരിയെയും ദിവസവും ആക്രമണങ്ങൾക്ക് ഇരയായി നീതി കിട്ടാതെ പോകുന്ന യുവതികളെയും മറച്ചു വെച്ച് സർക്കാർ മാധ്യമങ്ങൾക്ക് മുൻപിൽ കേരളം നമ്പർ വൺ എന്ന് പച്ച കള്ളം വിളിച്ചു പറഞ്ഞു.
ലക്ഷകണക്കിന് വരുന്ന റബ്ബർ കർഷകർക്ക് മോഹന സുന്ദര വാഗ്ദാനങ്ങൾ നൽകി ഓട്ട് വാങ്ങി വഞ്ചിച്ച ക്രൈസ്തവ ന്യുന പക്ഷങ്ങളെയും പുരോഹിതരെയും നിരന്തരം വേട്ടയാടിയ സർക്കാരാണ് ഇടതുപക്ഷ സർക്കർ. ആ സർക്കാരിന്റെ ഭാഗമായി നിന്നുകൊണ്ട് തന്നെ റബ്ബര്‍ ഉത്പാദക ഉത്തേജക പദ്ധതിയിൽ അടിസ്ഥാന സംഭരണ വില കൂട്ടുമെന്ന് പറഞ്ഞു ജനങ്ങളുടെ കണ്ണിൽ പൊടിയിട്ട് ഇടയ്‌ക്കിടെ നിവേദനങ്ങളുമായി മുഖ്യമന്ത്രിയെ സന്ദർശിച്ചു വെറും കുശലാഅന്വേഷണം മാത്രം നടത്തി കർഷകരെ വഞ്ചിച്ചതും ഇവിടുത്തെ എം.പി ജോസ് കെ മാണി തന്നെയാണ്.
കർഷകർക്കായി വിവിധ പദ്ധതികൾ നടപ്പിലാക്കിയ പിതാവിന്റെ പാതയിൽ നിന്ന് വ്യതിചലിച്ചു ഇടതു മുന്നണിക്കൊപ്പം ചേക്കറിയ ജോസ് കെ മാണി ഇനിയും സിപിഐഎമ്മിൽ നിന്ന് ഏറെ പഠിക്കാനുണ്ട്. സഹകരണ മേഖലയിലെ അഴിമതി പതിനായിരക്കണക്കിന് ജനങ്ങളുടെ കിടപ്പാടം ഇല്ലന്നാക്കി അതിന് മറുപടി പറയേണ്ടത് സഹകരണ മന്ത്രി വാസവനുമാണ് .
ഒരു വിചാരണ കൊണ്ട് മാത്രം ഇടതു പക്ഷ സർക്കാരിന്റെ ഭരണത്തിന് കീഴിലെ കറുത്ത ദിനങ്ങൾ ജനങ്ങളോട് പറഞ്ഞു തീരില്ല. ജനസമൂഹത്തോട് ഒപ്പം നിന്ന് ഇതിനെതിരെ നിരന്തരം പോരാടുമെന്നും ഹരി പറഞ്ഞു.
