ക്വാലാലംപൂര് : മലേഷ്യ മാസ്റ്റേഴ്സ് 2023 ല് ഇന്ത്യയുടെ എച്ച്എസ് പ്രണോയ് പുരുഷ സിംഗിള്സ് ഫൈനലില്. വനിതാ സിംഗിള്സില് പി വി സിന്ധു പരാജയപ്പെട്ടു.
ആദ്യ ഗെയിമിന്റെ അവസാനം ഇന്തോനേഷ്യയുടെ ക്രിസ്റ്റ്യന് അഡിനാറ്റ പരിക്കേറ്റ് പിന്മാറിയതിനെത്തുടര്ന്ന് ലോക ഒമ്പതാം നമ്പര് താരം എച്ച്എസ് പ്രണോയ് സെമിഫൈനല് പോരാട്ടത്തില് വാക്കോവര് നേടുകയായിരുന്നു.പ്രണോയ് 19-17 എന്ന സ്കോറിന് മുന്നിലെത്തിയപ്പോള്, ക്രിസ്റ്റ്യന് ആദിനാറ്റ പരിക്കേറ്റ് മത്സരത്തില് നിന്ന് പിന്മാറി. ഇതോടെ വിജയം ഇന്ത്യന് താരത്തിനായി.
തകര്പ്പന് ഫോമിലുള്ള എച്ച്എസ് പ്രണോയ് ലോക ആറാം നമ്പര് താരം ചൗ ടിയെന് ചെന്, നിലവിലെ ഓള് ഇംഗ്ലണ്ട് ചാമ്പ്യന് ലി ഷി ഫെങ്, മാഡ്രിഡ് മാസ്റ്റേഴ്സ് 2023 ജേതാവ് കെന്റ നിഷിമോട്ടോ എന്നിവരെ സെമിയിലേക്കുള്ള വഴിയില് പരാജയപ്പെടുത്തി.
അതേസമയം, വനിതാ സിംഗിള്സ് സെമിയില് രണ്ട് തവണ ഒളിമ്പിക് മെഡല് ജേതാവായ പി വി സിന്ധു 21-14, 21-17 എന്ന സ്കോറിന് ഇന്തോനേഷ്യയുടെ ലോക 9-ാം നമ്പര് താരം ഗ്രിഗോറിയ മാരിസ്ക തുന്ജംഗിനോട് തോറ്റു.
