മലപ്പുറം: തിരൂരങ്ങാടിയില് മെഡിക്കൽ പരിശോധനയ്ക്കായി കൊണ്ടുവന്ന പ്രതി അക്രമാസക്തനായി. വെള്ളിയാഴ്ച രാത്രിയിലാണ് സംഭവം. ചേലമ്പ്ര സ്വദേശി റഫീഖ് ആണ് ആക്രമാസക്തനായത്. താലൂക്ക് ആശുപത്രിയില് പരിശോധനയ്ക്ക് എത്തിച്ചപ്പോഴാണ് ആക്രമണം. ജീവനക്കാരെ ആക്രമിച്ച പ്രതി പോലീസുകാരെ ചവിട്ടി. ആക്രമണത്തിന്റെ ദൃശ്യങ്ങള് പുറത്ത് വന്നിട്ടുണ്ട്.
പ്രതിയുടെ കൈകൾ തോർത്ത്മുണ്ട് ഉപയോഗിച്ച് പിറകിലേക്ക് കെട്ടിയ ശേഷമാണ് വൈദ്യ പരിശോധന പൂർത്തിയാക്കിയത്. മദ്യപിച്ചെത്തിയ ഇയാൾ വയോധികന്റെ വീട്ടിലെ ജനലുകൾ പൊട്ടിച്ചെന്ന പരാതിയിലാണ് തേഞ്ഞിപ്പാലം പോലീസ് ഇയാളെ കസ്റ്റഡിയിലെടുത്തത്. രാത്രി 11.45 ഓടെയാണ് എസ്ഐയും രണ്ട് പോലീസുകാരും ചേർന്ന് ഇയാളെ തിരൂരങ്ങാടി താലൂക്ക് ആശുപത്രിയിൽ വൈദ്യ പരിശോധനക്കെത്തിച്ചത്.
ജീവനക്കാരുടെ സുരക്ഷയ്ക്ക് തോർത്ത് മുണ്ടും കുരുമുളക് സ്പ്രേയും ആശുപത്രി അധികൃതർ തന്നെ പോലീസിന് വാങ്ങി നൽകുകയായിരുന്നു.
