കോഴിക്കാട്: എംഡിഎംഎയുമായി എത്തിയ യുവാവ് രക്ഷപ്പെടാന് ശ്രമിക്കുന്നതിനിടെ വാഹനം ഓടിച്ചു കയറ്റിയത് കോഴിക്കോട് സിറ്റി പോലീസ് കമ്മിഷണർ ഓഫീസിലേക്ക്. സംഭവത്തില് തലശ്ശേരി മുഴുപ്പിലങ്ങാട് സ്വദേശി ഒമര് സുന്ഹറിനെ(35) അറസ്റ്റ് ചെയ്തു. മാനാഞ്ചിറയിലെ കമ്മിഷണർ ഓഫീസ് മുറ്റത്തേക്കാണ് പ്രതി വാഹനം ഓടിച്ച് കയറ്റിയത്.
കാറില് നിന്നും 15.061 ഗ്രാം എംഡിഎംഎ പോലീസ് കണ്ടെടുത്തു. ബുധനാഴ്ച ഉച്ചയ്ക്ക് 2.10നാണ് നാടകീയ സംഭവം. സരോവരം ഭാഗത്ത് ലഹരിവിൽപ്പന നടക്കുന്നുവെന്ന് ഡെപ്യൂട്ടി എക്സൈസ് കമ്മിഷണർക്ക് ലഭിച്ച വിവരത്തിന്റെ അടിസ്ഥാനത്തിലാണ് എക്സൈസ് സംഘത്തിന്റെ നേതൃത്വത്തിൽ പരിശോധന നടത്തിയത്. ഈ സമയത്താണ് ഇന്നോവ ക്രിസ്റ്റ കാറിർ പ്രതി മയക്കുമരുന്ന് ഉല്പ്പന്നങ്ങളുമായി എത്തിയത്.
ഡാന്സാഫ് സംഘത്തിന്റെയും കമ്മിഷണർ ഉമേഷിന്റെയും സഹായത്തോടെ എക്സൈസ് സംഘമാണ് പ്രതിയെ പിടികൂടിയത്. അസിസ്റ്റന്റ് എക്സൈസ് ഇന്സ്പെക്ടര് എം കെ മോഹന്ദാസിന്റെ നേതൃത്വത്തിലുളള സംഘമാണ് പ്രതിയെ പിടികൂടിയത്. എക്സൈസ് സംഘം തന്നെ പിന്തുടരുന്നുണ്ടെന്നു കണ്ട ഒമർ കാർ കമ്മിഷണർ ഓഫീസിലേക്ക് ഓടിച്ചു കയറ്റുകയായിരുന്നു.
