പേരൂര്‍ക്കട/തിരുവനന്തപുരം: മലയാളി ജവാന്‍ ഝാര്‍ഖണ്ഡില്‍ വാഹനാപകടത്തില്‍ മരിച്ചു. പേരൂര്‍ക്കട കുടപ്പനക്കുന്ന് പാതിരിപ്പള്ളി അമ്പഴംകോട് സ്വദേശി അരവിന്ദ് (34) ആണ് മരിച്ചത്. രാംഗഡിലെ പത്രാദു പോലീസ് സ്റ്റേഷന്‍ പരിധിയില്‍ തിങ്കളാഴ്ച രാത്രി 8.40നായിരുന്നു അപകടം.
സഹപ്രവര്‍ത്തകനായ ധര്‍മ്മപാലുമൊത്ത് ഇടറോഡിലൂടെ നടന്നു പോകുന്നതിനിടെ പിന്നിലൂടെ അമിതവേഗത്തില്‍ എത്തിയ അജ്ഞാതവാഹനം ഇരുവരെയും ഇടിക്കുകയായിരുന്നു എന്നാണ് ബന്ധുക്കള്‍ക്ക് ലഭിച്ച വിവരം. അരവിന്ദിന്റെ മൃതദേഹം ഝാര്‍ഖണ്ഡിലെ ആശുപത്രിയില്‍ സൂക്ഷിച്ചിരിക്കുകയാണ്.
സിഐഎസ്എഫ് യൂണിറ്റിലെ കോണ്‍സ്റ്റബിള്‍ ആയിരുന്നു അരവിന്ദ്. 10 വര്‍ഷം മുമ്പാണ് സൈനിക സേവനം ആരംഭിച്ചത്. ഈ മാസം നാട്ടിലെത്തിയ ശേഷം ചെന്നൈയില്‍ ജോയിന്‍ ചെയ്യാന്‍ ഇരിക്കെയാണ് മരണം. പരേതനായ മധുസൂദനന്‍ നായര്‍-അനിതകുമാരി ദമ്പതികളുടെ മകനാണ്. ഭാര്യ: ആതിര. മകന്‍: കാശി. ആനന്ദാണ് അരവിന്ദിന്റെ സഹോദരന്‍. തിരുവനന്തപുരം വിമാനത്താവളത്തില്‍ എത്തിക്കുന്ന മൃതദേഹം ചടങ്ങുകള്‍ക്ക് ശേഷം വീട്ടുവളപ്പില്‍ സംസ്‌കരിക്കും.
ജന്മഭൂമി ഓണ്‍ലൈന്‍