തിരുവനന്തപുരം: വന്ദേ ഭാരത് ട്രെയിനിന്റെ പൈലറ്റ് ക്യാബിന് കണ്ട് മോദിജിയുടെ ഫാന് ആയി മാറിയ യുവാവിന്റെ ഫെയ്സ് ബുക്ക് കുറിപ്പ് വൈറലാകുന്നു. ഒരു കാലത്ത് രാഷ്ട്രീയമായി മോദിജിയെ എതിര്ത്തിരുന്ന യുവാവ് 2014 മുതലുള്ള ഇന്ത്യയുടെ വികസനമാറ്റം കണ്ട് മോദിജിയുടെ ഫാന് ആയി മാറിയിരിക്കുന്നതായി കുറിപ്പില് പറയുന്നു.
വന്ദേഭാരത് ഡിസൈന് ടീമില് അംഗമായി ജോലി ചെയ്യുന്ന യുവാവ് പറയുന്നത് മോദി റെയില്വേ രംഗത്ത് കൊണ്ട് വന്ന മാറ്റം കണ്ടാല് എങ്ങിനെ മോദി ഫാന് അല്ലാതിരിക്കും എന്നാണ്. യുവാവിന്റെ ഫെയ്സ് ബുക്ക് പോസ്റ്റിന് നിരവധി കമന്റുകളാണ് എത്തുന്നത്. ഒരു വിമാനത്തിന് സമമായ അതിഗംഭീരമായ സൗകര്യങ്ങളും ആധുനിക സംവിധാനവുമാണ് വന്ദേഭാരതിന്റെ പൈലറ്റ് ക്യാബിനില്.
മോദി പ്രധാനമന്ത്രിയായി വരുന്നതിന് മുന്പ് ട്രെയിനില് ലോക്കോപൈലറ്റായിരുന്ന അന്നത്തെ തീട്ടം മണക്കുന്ന റെയില്വേ ട്രാക്കുകളെ വിമര്ശിക്കുന്നുണ്ട്. എന്നാല് മോദി ഭരണത്തില് വന്ന ശേഷം അതിവേഗം റെയില്വേ മാറുകയായിരുന്നു. ഇന്ന് റെയില്വേയുടെ ഇന്റഗ്രല് കോച്ച് ഫാക്ടറിയില് ഡിസൈന് എഞ്ചിനീയറായി ജോലി ചെയ്യുകയാണ് ഇയാള്.
വായിക്കാം അരുണ് സോമനാഥന് എന്ന യുവാവിന്റെ ഫെയ്സ്ബുക്ക് കുറിപ്പ്:
“വന്ദേ ഭാരതിന്റെ പൈലറ്റ് ക്യാബിൻ ദേ ഇങ്ങനെയിരിക്കും.. പൂർവ്വാശ്രമത്തിൽ ചെറിയ കപ്പിത്താനായിരുന്നതുകൊണ്ട് ഇതൊക്കെ കാണുമ്പോൾ ഓടിയ്ക്കാൻ കഴിയാത്ത ശ്ശി വിഷമമുണ്ട്.. എന്റെ ബാച്ച്മേറ്റ്സ് കൂട്ടുകാർക്കെല്ലാം ഇതോടിയ്ക്കാൻ കഴിയും..
2013 ൽ ലോക്കോ ജോലി ഉപേക്ഷിക്കുമ്പോൾ നമ്മളു വിചാരിക്കുന്നില്ലല്ലോ അന്നത്തെ രാഷ്ട്രീയശത്രുവായ മോദിജീ പ്രധാനമന്ത്രി ആകുമെന്നും അദ്ദേഹത്തിന്റെ വീക്ഷണത്തിൽ ഇത്തരം കിടിലൻ ട്രയിൻ പ്രൊജക്റ്റുകൾ വരുമെന്നും റയിൽവേ ആകെ മാറുമെന്നും ഒക്കെ.. ലിറ്ററലി തീട്ടക്കുഴി ആയിരുന്ന അന്നത്തെ ഒരു പ്ലാറ്റ്ഫോമിൽ നിന്ന് എഞ്ചിൻ കപ്ലിംഗ് ചെയ്യേണ്ടി വന്ന അവസ്ഥയിൽ റിസൈൻ ചെയ്യാൻ ചിന്തിച്ച കഥയൊക്കെ ഞാൻ മുൻപെഴുതിയിട്ടുണ്ടല്ലോ.. അവിടുന്ന് 2014 ൽ മോദീജി ഭരണത്തിലേറി.. ശേഷം ചരിത്രം. നിങ്ങൾ തന്നെ പറയൂ, അത്രയും ട്രോമാ അനുഭവിച്ച ഞാനൊക്കെ എങ്ങനെ മോദിജീ ഫാൻ ആകാതെ ഇരിക്കും.. എന്നേപ്പോലെ റയിൽവേ മാറ്റങ്ങൾ സാകൂതം നിരീക്ഷിച്ചാൽ, ഈഗോ കളയാനും തയ്യാറായാൽ, നിങ്ങളും ഒരു മോദീജീ ഫാൻ ആകും.. ഉറപ്പ്.
എന്തായാലും ഇന്നിതൊക്കെ ഓടിക്കാൻ പറ്റിയില്ലേലും ഇതുണ്ടാക്കുന്ന ഡിസൈൻ ടീമിൽ അംഗമാകാൻ കഴിഞ്ഞു എന്ന ചാരിതാർത്ഥ്യം ബാക്കി.. അപ്പോൾ കമ്മീഷനിംഗ് ടൈമിൽ ക്യാബിനിൽ കയറി ഇരുന്ന് പടമെടുത്ത് ആശ തീർക്കുക എന്നേ ഉള്ളൂ.. കഴിഞ്ഞവർഷം മുംബൈയിലേക്കുള്ള ട്രയിനിന്റെ കമ്മീഷനിംഗിന് എടുത്ത ഫയൽ ചിത്രം ആണിത്.”
