ഇന്ഡോര്: മധ്യപ്രദേശിലെ ഇന്ഡോറില് ശ്രീരാമ നവമി ആഘോഷങ്ങള്ക്കിടെ കിണറിന്റെ മേല്ക്കൂര തകര്ന്നുള്ള അപകടത്തില് മരിച്ചവരുടെ എണ്ണം 35 ആയി. ഇന്ഡോറിലെ ശ്രീ ബലേശ്വര് ജുലേലാല് ക്ഷേത്രത്തിലെ കിണറിന്റെ മേല്ക്കൂരയാണ് തകര്ന്നത്. അപകടത്തില് ഒരാളായെ കാണാതായി. ഇയാള്ക്കായി തെരച്ചില് നടത്തി വരികയാണ്.
വ്യാഴാഴ്ച രാമനവമി ആഘോഷങ്ങള്ക്കിടെയാണ് അപകടം സംഭവിക്കുന്നത്. കാണാതായ ആള് കിണറിനടിയില് കുടുങ്ങിക്കിടക്കുകയാണോ എന്നാണ് സംശയം. 14 പേരെ അപകടത്തില് നിന്ന് രക്ഷപ്പെടുത്തി. ഇന്ത്യന് ആര്മി, എന്ഡിആര്എഫ്, എസ്ഡിആര്എഫ് സംഘങ്ങളും പ്രദേശത്ത് രക്ഷാപ്രവര്ത്തനത്തിനായി സ്ഥലത്തുണ്ടെന്ന് കളക്ടര് ടി. ഇളയരാജ അറിയിച്ചു
ദുരന്തത്തില് പ്രധാനമന്ത്രി നരേന്ദ്രമോദി അനുശോചിച്ചു. മധ്യപ്രദേശ് മുഖ്യമന്ത്രി ശിവ്രാജ് ചൗഹാനുമായി സംസാരിച്ചെന്നും സ്ഥിതിഗതികള് ചോദിച്ച് വിലയിരുത്തിയെന്നും പ്രധാനമന്ത്രി ട്വിറ്ററിലൂടെ അറിയിച്ചു. രക്ഷാപ്രവര്ത്തനത്തിനും ദുരിതാശ്വാസ പ്രവര്ത്തനങ്ങള്ക്കും സംസ്ഥാന സര്ക്കാര് ദ്രുതഗതിയില് നേതൃത്വം നല്കുന്നുണ്ടെന്നും മരണപ്പെട്ടവരുടെ കുടുംബങ്ങളുടെ ദുഖത്തില് പങ്കുചേരുന്നുവെന്നും പ്രധാനമന്ത്രി പറഞ്ഞു.
അതേസമയം മധ്യപ്രദേശ് സര്ക്കാര് മരിച്ചവരുടെ കുടുംബത്തിന് 5 ലക്ഷം രൂപയും പരിക്കേറ്റവര്ക്ക് 50,000 രൂപയും ധനസഹായം പ്രഖ്യാപിച്ചിട്ടുണ്ട്. സംഭവത്തെ കുറിച്ച് സംസ്ഥാന സര്ക്കാരിന് പ്രാഥമിക റിപ്പോര്ട്ട് ജില്ല ഭരണകൂടം കൈമാറി. കാലപ്പഴക്കമുള്ള സ്ലാബിന് മുകളില് കൂടുതല് ആളുകള് കയറി നിന്നതാണ് അപകട കാരണം എന്നാണ് പ്രാഥമിക റിപ്പോര്ട്ട്.
