കൊച്ചി: ബ്രഹ്മപുരം വിഷപ്പുകയില് പ്രതികരണവുമായി നടന് മമ്മൂട്ടി. ഷൂട്ടിങ് കഴിഞ്ഞ് കൊച്ചിയിലെത്തിയപ്പോഴാണ് തനിക്ക് വലിയ ബുദ്ധിമുട്ടുകള് നേരിട്ടതായി നടന് പറഞ്ഞത്. ഷൂട്ടിങ്ങിനായി കുറച്ചു ദിവസമായി ഞാന് പുണെയില് ആയിരുന്നു. കഴിഞ്ഞ ദിവസമാണ് മടങ്ങിയെത്തിയത്. വീട്ടിലെത്തിയപ്പോള് മുതല് നല്ല ചുമ. ക്രമേണ അത് ശ്വാസംമുട്ടലായി. ഇന്നലെ ഷൂട്ടിങ്ങിനു വയനാട്ടിലെത്തി. ഇപ്പോഴും ശ്വാസംമുട്ടലുണ്ട്. പലരും സംസാരിച്ചപ്പോള് വീടുവിട്ടു മാറിനില്ക്കുകയാണെന്നും നാട്ടിലേക്ക് പോകുകയാണെന്നുമൊക്കെ പറഞ്ഞു. കൊച്ചിയിലും പരിസരത്തും മാത്രമല്ല പ്രശ്നം. സമീപ ജില്ലകള് പിന്നിട്ട് ഇത് വ്യാപിക്കുകയാണ്. വലിയ അരക്ഷിതാവസ്ഥയാണിതെന്നും മമ്മൂട്ടി.
തീയും പുകയും അണഞ്ഞാലും ബ്രഹ്മപുരം പ്രശ്നത്തിന് ഇനി വേണ്ടത് ശാശ്വതമായ പരിഹാരമാണെന്ന് നടന് മമ്മൂട്ടി. ശ്വാസം മുട്ടി ഇനിയും കൊച്ചിക്കാര്ക്ക് ജീവിക്കാന് വയ്യ. രാത്രിയില് ഞെട്ടി ഉണര്ന്ന് ശ്വാസംവലിച്ചും ചുമച്ചും ജീവിക്കാന് കഴിയില്ലെന്നും മമ്മൂട്ടി. ബ്രഹ്മപുരം പ്ലാന്റ് തുടങ്ങിയ കാലം മുതല് പ്രശ്നങ്ങളാണ്. അതു പരിഹരിക്കേണ്ട ചുമതല ഭരണകര്ത്താക്കള്ക്കുണ്ട്. അതിനുള്ള സംവിധാനം ഇവിടെ ഇല്ലെങ്കില് വിദേശത്തെ വിജയകരമായ രീതികളെയോ പുറത്തുനിന്നുള്ള നല്ല മാതൃകകളോ സ്വീകരിക്കണം. എല്ലാം ഭരണകൂടത്തിന്റെ ചുമലില് വച്ചു മാറിനിന്ന് ആരോപണങ്ങള് മാത്രമുന്നയിക്കുന്ന ജനസമൂഹമായി നമ്മളും മാറരുത്. പോസ്റ്റര് പ്ലാസ്റ്റിക് മാലിന്യങ്ങളുടെ കാര്യത്തില് നമ്മുടെ ഉത്തരവാദിത്തങ്ങള് നമ്മളും ചെയ്യണം. പ്ലാസ്റ്റിക് എന്ന വിപത്തിനെ അകറ്റി നിര്ത്തണമെന്നും മമ്മൂട്ടി.
