കൊച്ചി: മാലിന്യ സംസ്കരണത്തിൽ പൂർണ്ണമായും പരാജയപ്പെട്ട കൊച്ചി കോർപറേഷൻ പിരിച്ചു വിടണമെന്ന് കേന്ദ്ര വിദേശ കാര്യ സഹമന്ത്രി വി. മുരളീധരൻ മാധ്യമങ്ങളോട് പറഞ്ഞു. ചുരുങ്ങിയത് മേയേറോട് എങ്കിലും രാജി വെക്കാൻ സിപിഎം നിർദ്ദേശിക്കണം. തെരെഞ്ഞെടുത്ത ജനങ്ങളോട് ഇത്രയും ഉത്തരവാദിത്വം നിർവഹിക്കണമെന്നും അദ്ദേഹം വ്യക്തമാക്കി.
ബ്രഹ്മപുരത്തെ സ്ഥിതിഗതികൾ കേന്ദ്രസർക്കാരിനെ ബോധിപ്പിക്കും. കേന്ദ്ര ആരോഗ്യമന്ത്രിയേയും കേന്ദ്ര പരിസ്ഥിതി മന്ത്രിമാരെയും കണ്ട് ബ്രഹ്മപുരം സ്ഥിതിഗതികൾ ചർച്ച ചെയ്യും. സ്മാർട്ട് സിറ്റിയുടെ പേരിൽ കൊച്ചിക്ക് കേന്ദ്രം അനുവദിച്ച കോടികൾ എന്ത് ചെയ്തെന്ന് മാറി മാറി ഭരിച്ചവർ പറയണം. ഇക്കാര്യം കേന്ദ്ര നഗരവികസന മന്ത്രിയെബോധ്യപ്പെടുത്തുമെന്നും മുരളീധരൻ പറഞ്ഞു.
വലിയൊരു അഴിമതിയാണ് ബ്രഹ്മപുരത്ത് നടന്നത്. ബംഗളുരുവിൽ നിന്നും ഒഴിവാക്കിയ കമ്പനിയെയാണ് ബ്രഹ്മപുരത്തെ മാലിന്യ നിർമാർജനത്തിന് ചുമതലപ്പെടുത്തിയത്. അവർ പരാജയമെന്ന് കണ്ടിട്ടും കേരളത്തിലെ മുഴുവൻ മാലിന്യ നിർമാർജനത്തിനും അവരെ ചുമതലപ്പെടുത്തുകയായിരുന്നു. വിഷയത്തിൽ മുഖ്യമന്ത്രി നേരിട്ട് ഇടപെടാത്തതിലും അദ്ദേഹം വിമർശനം ഉന്നയിച്ചു. കൊച്ചിയിൽ വിഷപ്പുകയേറ്റ് ആയിരത്തോളം ജനങ്ങൾ ചികിത്സയിലാണ്. ഒരു നാടിന് നേതൃത്വം നൽകുന്ന വ്യക്തി ഇത്തരത്തിലുള്ള ഒരു ദുരന്തം സംഭവിക്കുമ്പോൾ അത് പരിഹരിക്കുന്നതിനുള്ള നടപടികളല്ലേ എടുക്കേണ്ടത്. അല്ലാതെ രണ്ട് മന്ത്രിമാരെ പറഞ്ഞയക്കുന്നു. അവർ എപ്പോൾ അണയ്ക്കാൻ സാധിക്കും എന്ന് പറയാൻ സാധിക്കില്ല എന്ന സമീപനം എടുക്കുന്നു. ഇത്തരം ദുരന്തങ്ങൾ ഉണ്ടാകുമ്പോൾ നടപടി സ്വീകരിക്കാൻ മുഖ്യമന്ത്രി തയ്യാറാകാത്തത് എന്തുകൊണ്ടെന്ന് അദ്ദേഹം ആരാഞ്ഞു.
വൈക്കം വിശ്വന്റെ മരുമകന് കൊച്ചിയിൽ മാത്രമല്ല കേരളം മുഴുവനായും മാലിന്യ സംസ്കരണത്തിന്റെ മുഴുവൻ കരാറുകളും എഴുതി നൽകിയതിൽ ഉത്തരവാദിത്യം സ്വയം ഉണ്ടായിരുന്നു എന്നതിന്റെ ജാള്യത കൊണ്ടാണോ അദ്ദേഹം മിണ്ടാതിരിക്കുന്നത്. കേരളത്തിലെ ജനങ്ങളോട് ഇത്രയെങ്കിലും ഉത്തരവാദിത്വം കാണിക്കാൻ സർക്കാർ തയ്യാറാകണം. ഈ ധാർമികമായി ഈ അഴിമതിക്ക് കാരണക്കാരായ ആളുകൾക്കെതിരെ നടപടിയുണ്ടാകണമെന്നും മുരളീധരൻ ആവശ്യപ്പെട്ടു.
