തിരുവനന്തപുരം: ആറ്റുകാല്‍ പൊങ്കാലയ്‌ക്ക് അടുപ്പുണ്ടാക്കാന്‍ ഉപയോഗിക്കുന്ന ചുടുകട്ടകള്‍ നഗരസഭയല്ലാതെ മറ്റാരെങ്കിലും ശേഖരിച്ചാല്‍ പിഴ ഈടാക്കുമെന്ന് തിരുവനന്തപുരം മേയര്‍ ആര്യാ രാജേന്ദ്രന്‍. പൊങ്കാലയ്‌ക്ക് ഉപയോഗിക്കുന്ന ഈ ചുടുകല്ലുകള്‍ ലൈഫ് പദ്ധതിയില്‍ നിര്‍മ്മിക്കുന്ന വീടുകള്‍ പണിയാന്‍ ഉപയോഗിക്കമെന്ന് മേയര്‍ വ്യക്തമാക്കി. വാര്‍ത്താസമ്മേളനത്തിലാണ് മേയര്‍ ആര്യാ രാജേന്ദ്രന്‍ ഇക്കാര്യം വ്യക്തമാക്കിയത്.
ഈ ചുടുകട്ടകള്‍ ശേഖരിക്കുന്നതിനായി 14 വാഹനങ്ങള്‍ ഏര്‍പ്പാടു ചെയ്തിട്ടുണ്ടെന്നും മേയര്‍ പറഞ്ഞു. മറ്റാരെങ്കിലും ഈ ചുടുകട്ട എടുത്താല്‍ പിഴ ഈടാക്കുമെന്നും മേയര്‍ വ്യക്തമാക്കി. സ്വകാര്യവ്യക്തികളാണ് അടുപ്പുണ്ടാക്കാന്‍ ചുടുകട്ടകള്‍ കൊണ്ടുവരുന്നത്. ഇത് ആരെങ്കിലും ശേഖരിച്ചാല്‍ അവര്‍ക്കെതിരെ എന്ത് നടപടിയാണ് എടുക്കുകയെന്നോ എത്രരൂപ പിഴ ഈടാക്കുമെന്നും നഗരസഭ വ്യക്തമാക്കിയില്ല.
പൊങ്കാലയ്‌ക്ക് ശേഷമുള്ള ശുചീകരണ വേളയിലാകും കല്ല് ശേഖരിക്കുക. പൊങ്കാലയ്‌ക്കുള്ള മണ്‍ പാത്രങ്ങളിൽ മായം പരിശോധിക്കാൻ സാമ്പിളുകൾ പരിശോധനയ്‌ക്ക് അയച്ചതായി മേയർ അറിയിച്ചു. പൊങ്കാലയോടനുബന്ധിച്ച് കൂടുതൽ ശുചിമുറികൾ സജ്ജമാക്കുമെന്നും മേയര്‍ പറഞ്ഞു.
പൊങ്കാല ശുചീകരണത്തിനുള്ള വാഹനങ്ങളും മേയർ ഫ്ലാഗ് ഓഫ് ചെയ്തു. കോവിഡ് മഹാമാരിക്ക് ശേഷമുള്ള ആദ്യ പൊങ്കാല ആയതിനാല്‍ വലിയ ഭക്തജന തിരക്കാണ് ഇത്തവണ പ്രതീക്ഷിക്കുന്നത്. പൊങ്കാലക്ക് ദിവസങ്ങൾ ബാക്കി നിൽക്കെ ആറ്റുകാല്‍ ക്ഷേത്രവും പരിസരവും ഉത്സവ ലഹരിയിലാണ് .
ആറ്റുകാൽ പൊങ്കാലയ്‌ക്കായി 5.16 കോടി രൂപയുടെ പ്രവർത്തനങ്ങളാണ് നഗരസഭയുടെ ഭാഗത്ത് നിന്ന് നടത്തിയതെന്നും മേയർ പറഞ്ഞു. ശുചികരണ പ്രവർത്തനത്തിന് 1 കോടി രൂപയും മാറ്റി വച്ചു.
