തിരുവനന്തപുരം: കന്യാസ്‌ത്രീ പഠനം നടത്തുകയായിരുന്ന യുവതി കോണ്‍വെന്റില്‍ തൂങ്ങിമരിച്ച നിലയില്‍. തമിഴ്‌നാട് തിരുപ്പൂര്‍ സ്വദേശിനി അന്നപൂരണി (27) ആണ് മരിച്ചത്. കഠിനംകുളം വെട്ടുതുറയിലെ റോസ്‌മിനിയന്‍സ് ഔവര്‍ ലേഡി കോണ്‍വെന്റില്‍ കിടപ്പുമുറിയില്‍ ഇവരെ തൂങ്ങിമരിച്ച നിലയില്‍ കണ്ടെത്തുകയായിരുന്നു.
രാവിലെ പ്രാര്‍ത്ഥനയ്‌ക്ക് എത്താത്തതിനെത്തുടര്‍ന്ന് ഒപ്പമുള്ളവര്‍ അന്വേഷിച്ചെത്തിയപ്പോഴാണ് അന്നപൂരണിയെ ഫാനില്‍ തൂങ്ങിയനിലയില്‍ കാണുന്നത്. മുറിയില്‍ ഇവര്‍ തനിച്ചായിരുന്നു. മുറിയില്‍ നിന്ന് ആത്മഹത്യാക്കുറിപ്പും കണ്ടെടുത്തു. തനിക്ക് കന്യാസ്‌ത്രീയാകാന്‍ യോഗ്യതയില്ലെന്നും അതിനാല്‍ പോകുന്നു എന്നുമാണ് കുറിപ്പില്‍ എഴുതിയിരിക്കുന്നത്.
ഒരുവര്‍ഷം മുന്‍പാണ് യുവതി കഠിനംകുളത്തെ കോണ്‍വെന്റിലെത്തിയത്. പഠനത്തിന്റെ ഭാഗമായി മഹാരാഷ്‌ട്രയിലെ സാമൂഹിക സേവനത്തിന് ശേഷം കഴിഞ്ഞമാസമായിരുന്നു ഇവര്‍ മടങ്ങിയെത്തിയത്. ആറ്റിങ്ങല്‍ പൊലീസ് സ്ഥലത്തെത്തി നടപടികള്‍ ആരംഭിച്ചു.
