കൊച്ചി : സ്വപ്ന സുരേഷിനായി ബാങ്ക് ലോക്കര് തുറന്നു നല്കിയത് മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം.ശിവശങ്കര് പറഞ്ഞിട്ടാണെന്ന് ചാര്ട്ടേഡ് അക്കൗണ്ടന്റ് വേണുഗോപാല്. എന്ഫോഴ്സ്മെന്റിന് നല്കിയ മൊഴിയിലാണ് ഇക്കാര്യം വ്യക്തമാക്കുന്നത്. ലൈഫ് മിഷന് കേസില് ശിവശങ്കറിന്റെ പങ്കാളിത്തം പുറത്തുകൊണ്ടുവരുന്നതിനായി വേണുഗോപാലിനെ ഇഡി സംഘം വിളിച്ചു വരുത്തി ചോദ്യം ചെയ്യുകയായിരുന്നു.
കൊച്ചിയിലെ ഇഡി ഓഫീസില് പത്തു മണിക്കൂര് നീണ്ട മൊഴിയെടുക്കലിനിടെയാണ് ലോക്കര് തുറന്നു നല്കിയതിന് പിന്നില് ശിവശങ്കറാമെന്ന് വേണുഗോപാല് ആവര്ത്തിച്ചത്. വേണുഗോപാലിന്റെയും സ്വപ്നാ സുരേഷിന്റെയും പേരിലുള്ള ഈ ലോക്കറില് നിന്നാണ് ലൈഫ്മിഷന് അഴിമതിക്കേസിലെ കോഴത്തുകയായ ഒരുകോടി രൂപ കണ്ടെടുത്തത്. ശിവശങ്കറിന്റെ സുഹൃത്ത് കൂടിയാണ് വേണുഗോപാല്.
ലോക്കറില് വയ്ക്കാന് സ്വപ്ന ആദ്യം കൊണ്ടുവന്ന 30 ലക്ഷത്തെപ്പറ്റി താനും ശിവശങ്കറും തമ്മില് ചര്ച്ച നടത്തിയിരുന്നെന്നും വേണുഗോപാല് മൊഴി നല്കിയിട്ടുണ്ട്. ശിവശങ്കര് പറഞ്ഞിട്ടാണ് താന് തന്റെയും സ്വപ്നയുടെയും പേരില് ലോക്കര് തുറന്നത്. ലോക്കര് തുറന്നപ്പോള് ആദ്യ ഘട്ടത്തില് 30 ലക്ഷം രൂപയാണ് ഇതില് വെച്ചത്. ഇക്കാര്യം താന് ശിവശങ്കറിനെ അറിയിച്ചിരുന്നു. പിന്നീട് ലോക്കര് തുറന്നത് സ്വപ്ന ഒറ്റയ്ക്കാണ്. താന് ഒപ്പമുണ്ടായിരുന്നില്ല. ആ ഘട്ടത്തില് ലോക്കര് തുറന്ന കാര്യം ശിവശങ്കറിനെ താന് അറിയിച്ചിരുന്നുവെന്നും എന്നാല് എന്താണ് സ്വപ്ന ലോക്കറില് വെച്ചതെന്ന് തനിക്ക് അറിയില്ലെന്നും വേണുഗോപാല് ഇഡി ഉദ്യോഗസ്ഥര്ക്ക് മൊഴി നല്കി.
കോഴ ഇടപാടിനെപ്പറ്റി താന് ഒന്നും അറിഞ്ഞിരുന്നില്ലെന്ന് ശിവശങ്കര് അന്വേഷണ സംഘത്തോട് ആവര്ത്തിച്ചത്. ചോദ്യം ചെയ്യലിനോടും സഹകരിച്ചിരുന്നില്ല. തുടര്ന്ന് വേണുഗോപാലിനെ ഇഡി സംഘം വിളിപ്പിക്കുകയായിരുന്നു. ഇതോടെ ശിവശങ്കര് പറഞ്ഞിരുന്നത് കള്ളമാണെന്നും ലൈഫ് മിഷന് കേസില് ഇയാള്ക്ക് പങ്കാളിത്തമുണ്ടെന്നും വ്യക്തമാകുകയായിരുന്നു. ലൈഫ് മിഷന് കോഴ ഇടപാട് കേസില് ചൊവ്വാഴ്ച ആണ് ശിവശങ്കറെ അറസ്റ്റ് ചെയ്യുന്നത്. തുടര്ച്ചയായ ചോദ്യം ചെയ്യലുകള്ക്ക് ശേഷമാണ് ശിവശങ്കറെ അറസ്റ്റ് ചെയ്തത്.
