തിരുവനന്തപുരം: സംസ്ഥാനത്ത് കൊവിഡ് കേസുകള് കുറഞ്ഞു വരുന്ന സാഹചര്യത്തില് മൃതദേഹം പോസ്റ്റ് മോര്ട്ടം ചെയ്യുന്നതിന് മുമ്പുള്ള നിര്ബന്ധിത കൊവിഡ് പരിശോധന ഒഴിവാക്കി. മരണപ്പെട്ട കേസില് കൊവിഡ് ആണെന്ന് ശക്തമായ ക്ലിനിക്കല് സംശയം തോന്നിയാല് റാപ്പിഡ് ആന്റിജന് ടെസ്റ്റ് മതിയാകും.
കൊവിഡ് ബാധിച്ച് മരിച്ച വ്യക്തികളുടെ മൃതദേഹം കുളിപ്പിക്കുകയാണെങ്കില് രോഗം പകരാതിരിക്കാന് കൊവിഡ് സുരക്ഷാ മാര്ഗനിര്ദേശങ്ങള് പാലിക്കണം 60 വയസിന് മുകളിലുള്ളവരും ഹൃദ്രോഗം, പ്രമേഹം മുതലായ ഗുരുതര രോഗമുള്ളവരും മൃതദേഹവുമായി നേരിട്ടിടപെടരുത്. കൊവിഡ് വാക്സിനേഷന്റെ മുഴുവന് ഡോസും എടുത്തവര് മൃതദേഹം കൈകാര്യം ചെയ്യുന്നത് നല്ലത്.
മൃതദേഹം സൂക്ഷിച്ച സ്ഥലങ്ങള് സോഡിയം ഹൈപ്പോക്ലോറൈറ്റ് ലായനി ഉപയോഗിച്ച് വൃത്തിയാക്കണം. മൃതദേഹവുമായി ഇടപെടുന്ന എല്ലാവരും സോപ്പ് ഉപയോഗിച്ച് നന്നായി കുളിക്കണം. അവര് 14 ദിവസം പനി, ചുമ, തൊണ്ടവേദന, ക്ഷീണം, വയറിളക്കം എന്നിവയുണ്ടോയെന്ന് സ്വയം നിരീക്ഷിക്കണമെന്നും മാര്ഗ നിര്ദേശങ്ങളില് പറയുന്നു.
