കൊല്ലം: കരുനാഗപ്പള്ളിയില് ലഹരി വസ്തു കടത്തിയ ലോറികളില് ഒന്ന് സിപിഎം നേതാവിന്റേത്. ആലപ്പുഴ നഗരസഭ ക്ഷേമകാര്യ സ്റ്റാന്ഡിംഗ് കമ്മിറ്റി ചെയര്മാന് എ.ഷാനവാസാണ് ലോറിയുടെ ഉടമ. എന്നാല് തന്റെ ലോറി കട്ടപ്പന സ്വദേശിയ്ക്ക് വാടകയ്ക്ക് നല്കിയിരുന്നെന്നാണ് ഷാനവാസിന്റെ വാദം. ഇത് ശരിയാണോയെന്ന് അന്വേഷണ സംഘം പരിശോധിച്ചുവരികയാണ്. കഴിഞ്ഞ വെള്ളിയാഴ്ചയാണ് വാടകക്കരാര് എഴുതിയതെന്നാണ് ഷാനവാസ് പറയുന്നത്. ഞായറാഴ്ച പുലര്ച്ചെയാണ് ലോറി പിടികൂടിയത്. ഒരു കോടി രൂപ വിലവരുന്ന 1.25 ലക്ഷം പാക്കറ്റ് പാന്മസാലയാണ് രണ്ട് ലോറികളിലായി കടത്തിയത്.
ലോറി ഡ്രൈവര് കരുനാഗപ്പള്ളി തൊടിയൂര് സ്വദേശി തൗസീഫ് പിടിയിലായിരുന്നു. സവാള ചാക്കുകള് മുകളില് അടുക്കിയ നിലയിലായിരുന്നു പാന്മസാല സൂക്ഷിച്ചിരുന്നത്. മറ്റൊരു ലോറി ഡ്രൈവര് പൊലീസിനെ വെട്ടിച്ചുകടന്നുകളഞ്ഞു.
