കോഴിക്കോട് : പഞ്ചാബ് നാഷണല് ബാങ്ക് തട്ടിപ്പില് നഷ്ടമായ തുകയെല്ലാം തിരിച്ച് നല്കണമെന്ന് ആവശ്യപ്പെട്ട് കോഴിക്കോട് കോര്പ്പറേഷന്. തട്ടിപ്പില് നഷ്ടമായ മുഴുവന് തുകയും 24 മണിക്കൂറിനുള്ളില് തിരിച്ചേല്പ്പിക്കണമെന്നാണ് കോര്പ്പറേഷന്റെ ആവശ്യം. ഇതുസംബന്ധിച്ച് ബാങ്ക് അധികൃതര്ക്ക് ഇന്ന് തന്നെ കോര്പ്പറേഷന് കത്ത് നല്കും.
ബാങ്കില് നടത്തിയ മുഴുവന് ഇടപാടുകളുടേയും വിശദാംശങ്ങള് തേടാനും കോര്പ്പറേഷന് തീരുമാനിച്ചിട്ടുണ്ട്. നിലവില് ക്രൈംബ്രാഞ്ച് കേസില് അന്വേഷണം നടത്തി വരികയാണ്. ബാങ്ക് ഇടപാടുകളുടെ വിശദാംശങ്ങള് ക്രൈം ബ്രാഞ്ച് ശേഖരിച്ചു കഴിഞ്ഞു. ബാങ്ക് മാനേജര് പി.എ. റിജില് കോര്പറേഷനില് നിന്ന് തട്ടിയെടുത്ത 12.68 കോടി രൂപയില് 10 കോടി രൂപയും ഓഹരി വിപണിയില് ഊഹക്കച്ചവടത്തിന് ഇറക്കിയെന്നാണ് പോലീസ് കണ്ടെത്തല്. ബാക്കി തുക വായ്പാ തിരിച്ചടവിനും ഓണ്ലൈന് ഗെയിം കളിക്കാനും ഉപയോഗിച്ചു.
അതിനിടെ ബാങ്കിന് മുന്നില് ഇന്ന് എല്ഡിഎഫ് പ്രവര്ത്തകര് ഉപരോധ സമരം നടത്തി. കോഴിക്കോട് കോര്പ്പറേഷന്റെ നഷ്ടപ്പെട്ട പണം ഉടന് ബാങ്ക് തിരിച്ചു നല്കണമെന്നാവശ്യപ്പെട്ടായിരുന്നു എല്ഡിഎഫിന്റെ പ്രതിഷേധം. പഞ്ചാബ് നാഷണല് ബാങ്കിന്റെ മെയില് ശാഖയിലേക്കും തട്ടിപ്പ് നടന്ന ലിങ്ക് റോഡ് ശാഖയിലേക്കും പ്രതി റിജിന് ജോലി ചെയ്യുന്ന എരഞ്ഞിപ്പാലം ശാഖയിലേക്കുമാണ് എല്ഡിഎഫ് മാര്ച്ച് നടത്തിയത്.
