കോഴിക്കോട്: വിവാഹ വാഗ്ദാനം നല്കി യുവതിയെ വിവിധയിടങ്ങളില് കൊണ്ടുപോയി പീഡിപ്പിച്ച യുവാക്കള് അറസ്റ്റില്. കൊളത്തറ ചെറുവണ്ണൂര് കോട്ടാലട എ.കെ. നിഹാദ് ഷാന് (24), സുഹൃത്ത് മലപ്പുറം വാഴയൂര് മാങ്ങോട്ട് പുറത്ത് മുഹമ്മദ് ജുനൈദ് (26) എന്നിവരാണ് അറസ്റ്റിലായത്. കന്യാകുമാരി സ്വദേശിനിയായ യുവതിയാണ് പീഡനത്തിനിരയായത്. യുവതിയെ കോഴിക്കോട്, മലപ്പുറം ജില്ലകളിലെ വിവിധയിടങ്ങളിലെത്തിച്ച് പീഡിപ്പിച്ചെന്നാണ് പരാതി. ഒക്ടോബര് 29നാണ് യുവതി പൊലീസില് പരാതി നല്കിയത്.
നിഹാദ് ആണ് കേസിലെ ഒന്നാം പ്രതി. പരാതിക്കാരിയും നിഹാദും സോഷ്യല് മീഡിയയിലൂടെയാണ് പരിചയപ്പെട്ടത്. തുടര്ന്ന് പ്രണയത്തിലായി. തന്നെ വിവാഹം കഴിക്കണമെന്ന് യുവതി ആവശ്യപ്പെട്ടപ്പോള് മതംമാറാന് പ്രതി ഭീഷണിപ്പെടുത്തി. ഇത് പരാതിക്കാരി എതിര്ത്തതോടെ ബന്ധത്തില് നിന്ന് പിന്മാറാന് യുവാവ് നിര്ബന്ധിച്ചു. യുവതി ബന്ധത്തില് നിന്ന് പിന്മാറാന് തയ്യാറാകാതെ വന്നതോടെ അപകടത്തില് തനിക്ക് ഓര്മനഷ്ടപ്പെട്ടെന്ന് സുഹൃത്തുക്കള് മുഖേനെ നിഹാദ് യുവതിയെ അറിയിക്കുകയായിരുന്നു. ഇയാള് പെരുന്തല്മണ്ണയിലെ ആശുപത്രിയില് ചികിത്സയിലാണെന്നും പറഞ്ഞു. അങ്ങനെ പെരിന്തല്മണ്ണയിലെത്തിച്ച യുവതിയെ തെറ്റിദ്ധരിപ്പിച്ച് വിവിധയിടങ്ങളില് കൊണ്ടുപോയി പീഡിപ്പിക്കുകയായിരുന്നെന്ന് പരാതിയില് പറയുന്നു.
