തിരുവനന്തപുരം: എല്ഡിഎഫ് രാജ്ഭവന് വളഞ്ഞ ദിവസം, മന്ത്രി പി.രാജീവിന്റെ സാന്നിധ്യത്തില്, തലസ്ഥാനത്തുതന്നെ ഗവര്ണറുടെ പദവിയും അധികാരവും ശക്തമായ ഭാഷയില് ഓര്മിപ്പിച്ച് തമിഴ്നാട് ഗവര്ണര് ആര്.എന്. രവി. ഗവര്ണര് റബര് സ്റ്റാമ്പല്ലെന്നും ഗവര്ണറുടെ അധികാരം സംബന്ധിച്ച് സുപ്രീം കോടതി വളരെ വ്യക്തമായി പറഞ്ഞിട്ടുണ്ടെന്നും ആര്.എന്. രവി പറഞ്ഞു. കേരള ലോകായുക്ത സംഘടിപ്പിച്ച ലോകായുക്ത ദിനാചരണ പരിപാടിയില് മുഖ്യാതിഥിയായി പങ്കെടുത്ത് പ്രസംഗിക്കുകയായിരുന്നു അദ്ദേഹം.
ഗവര്ണര് ഇടപെടുമ്പോള് അങ്ങനെ ചെയ്യാന് പാടില്ല, ഇങ്ങനെ ചെയ്യാന് പാടില്ല എന്ന തരത്തില് ചര്ച്ചകളുണ്ടാകുക സ്വാഭാവികമാണ്. അത്തരം അപശബ്ദങ്ങള്ക്കല്ല, രാജ്യത്തിന്റെ ഭരണഘടനയ്ക്കു മാത്രമാണ് പ്രസക്തി. ലോകായുക്ത പോലുള്ള സ്ഥാപനങ്ങളെ അസ്ഥിരപ്പെടുത്താനുള്ള ശ്രമം നടക്കുമ്പോള് ഗവര്ണര്ക്ക് കൃത്യമായി ഇടപെടാനാകും. ഭരണഘടനാ സ്ഥാപനങ്ങളെ ബാധിക്കുന്ന തരത്തിലുള്ള നിയമ നിര്മാണങ്ങളില് ഗവര്ണര്ക്ക് ശക്തമായ നിലപാടുകള് സ്വീകരിക്കാന് അധികാരമുണ്ട്. ലോകായുക്തയെപ്പോലുള്ള സ്ഥാപനങ്ങളെ അസ്ഥിരപ്പെടുത്താന് രാജ്യത്ത് പലയിടത്തും ശ്രമമുണ്ട്. അത്തരം ശ്രമങ്ങള് തടയാന് എല്ലാവര്ക്കും ഉത്തരവാദിത്തമുണ്ടെന്നും തമിഴ്നാട് ഗവര്ണര് പറഞ്ഞു.
ഗവര്ണര്ക്ക് എന്തൊക്കെ അധികാരങ്ങള് ഉണ്ടെന്നും ഇല്ലെന്നും റബര് സ്റ്റാമ്പാണോ അല്ലയോ എന്നുമൊക്കെ വിവിധ കേസുകളില് സുപ്രീം കോടതി വിധികളുണ്ട്. ബില്ലുകള് പരിഗണിക്കുമ്പോള് ഗവര്ണര്ക്ക് എന്തെല്ലാം അധികാരമുണ്ടെന്ന് 1979ല് സുപ്രീം കോടതി ചീഫ് ജസ്റ്റിസ് ജസ്റ്റിസ് വൈ.വി. ചന്ദ്രചൂഡ് അധ്യക്ഷനായ ഭരണഘടനാ ബെഞ്ചും വ്യക്തമാക്കിയിട്ടുണ്ട്. നിയമസഭ പാസാക്കുന്ന ബില്ലുകളില് ആര്ട്ടിക്കിള് 200 അനുസരിച്ച് മൂന്നു തരത്തില് ഗവര്ണര്ക്ക് തീരുമാനമെടുക്കാം. ബില്ലിന് സമ്മതം നല്കുകയോ സമ്മതം തടഞ്ഞുവയ്ക്കുകയോ അല്ലെങ്കില് രാഷ്ട്രപതിയുടെ പരിഗണനയ്ക്കായി അയയ്ക്കുകയോ ചെയ്യാം. ഭരണഘടന പ്രകാരം ബില്ലില് സമ്മതമറിയിക്കാതെ തടഞ്ഞുവയ്ക്കാനുള്ള ഗവര്ണറുടെ അധികാരം സംബന്ധിച്ച് സുപ്രീം കോടതിയും വ്യക്തമാക്കിയിട്ടുണ്ട്, അദ്ദേഹം വിശദീകരിച്ചു. നിയമസഭ ബാങ്ക്വറ്റ് ഹാളില് നടന്ന ചടങ്ങില് പ്രതിപക്ഷ നേതാവ് വി.ഡി. സതീശന്, നിയമ മന്ത്രി പി. രാജീവ്, ലോകായുക്ത ജസ്റ്റിസ് സിറിയക് ജോസഫ്, ഉപലോകായുക്തമാരായ ജസ്റ്റിസ് ബാബു മാത്യു പി. ജോസഫ്, ജസ്റ്റിസ് ഹാറൂണ് അല് റഷീദ്, രജിസ്ട്രാര് ഷിജു ഷെയ്ഖ് തുടങ്ങിയവര് പങ്കെടുത്തു.
ബില്ലുകളില് ഒപ്പിടാന് വിസമ്മതിച്ചതിനാല് ഗവര്ണറെ പിന്വലിക്കണമെന്നാവശ്യപ്പെട്ട് തമിഴ്നാട് സര്ക്കാര് രാഷ്ട്രപതിക്ക് കത്തയച്ചിരിക്കേയാണ് ആര്.എന്. രവിയുടെ പരാമര്ശങ്ങള്. കേരള ഗവര്ണര്ക്കെതിരായ രാജ്ഭവന് മാര്ച്ചില് ഡിഎംകെ പ്രതിനിധികളും പങ്കെടുത്തിരുന്നു. ഈ സാഹചര്യത്തിലാണ് തമിഴ്നാട് ഗവര്ണറുടെ പരാമര്ശം.
