പാലക്കാട് : വടക്കഞ്ചേരി വാഹനാപകടവുമായി ബന്ധപ്പെട്ട് ടൂറിസ്റ്റ് ബസ് ഡ്രൈവര്‍ ജോമോനെതിരെ നടപടികള്‍ കടുപ്പിച്ച് പോലീസ്. ജോമോനെതിരെ കൂടുതല്‍ മനപ്പൂര്‍വ്വമല്ലാത്ത നരഹത്യയ്‌ക്കാണ് പോലീസ് ആദ്യം കേസെടുത്തത്. ഇന്ന് വിശദമായി ചോദ്യം ചെയ്്ത ശേഷം നടപടി കൈക്കൊള്ളാനാണ് തീരുമാനം.
ഡ്രൈവര്‍ ജോമോന്റെ അറസ്റ്റ് രേഖപ്പെടുത്തി. അപകടസമയം ജില്ലാ പോലീസ് മേധാവിയോട് ഉള്‍പ്പെടെ കള്ളം പറഞ്ഞാണ് ജോമോന്‍ ആശുപത്രിയിലെത്തി ചികിത്സ തേടി കടന്നുകളഞ്ഞത്. ആലത്തൂര്‍ ഡിവൈഎസ്പിയുടെ നേതൃത്വത്തിലുള്ള പ്രത്യേക സംഘമാണ് നിലവില്‍ അന്വേഷണം നടത്തുന്നത്.
അപകടം ഉണ്ടായ സാഹചര്യം, ഇയാള്‍ മദ്യപിച്ചായിരുന്നോ വാഹനം ഓടിച്ചത് തുടങ്ങിയ കാര്യങ്ങളിലെല്ലാം ഇന്ന് പോലീസ് ചോദ്യം ചെയ്യുമ്പോള്‍ വിശദമായി അന്വേഷിക്കും. വേണ്ടി വന്നാല്‍ വൈദ്യ പരിശോധനയ്‌ക്കും വിധേയമാക്കും. ഡ്രൈവര്‍ ജോമോന്റെ അറസ്റ്റ് രേഖപ്പെടുത്തി. ഇയാള്‍ക്കെതിരെ കൂടുതല്‍ വകുപ്പുകള്‍ ചുമത്തുന്നതുമായി ബന്ധപ്പെട്ട് കേരളാ പോലീസ് ഉന്നത വൃത്തങ്ങള്‍ ചര്‍ച്ച നടത്തി വരികയാണ്.
അപകടത്തിന് ശേഷം ഒളിവില്‍ പോയ ജോമോനെ വ്യാഴാഴ്ച വൈകിട്ടോടെയാണ് പോലീസ് കസ്റ്റഡിയില്‍ എടുക്കുന്നത്. തിരുവനന്തപുരത്തേക്ക് കടക്കാന്‍ ശ്രമിക്കുന്നതിനിടെ കൊല്ലം ചവറയില്‍ വെച്ച് ബസ് ഉടമയായ അരുണിനൊപ്പമാണ് പിടിയിലായത്.
അതേസമയം ബസിന്റെ ഫിറ്റ്‌നസ് റദാക്കുന്നതും, ഡ്രൈവറുടെ ലൈസന്‍സ് റദ്ദാക്കുന്നതും ഉള്‍പ്പെടെയുള്ള നടപടികളും മോട്ടോര്‍ വാഹന വകുപ്പിന്റെ ഭാഗത്തുനിന്നും ഉണ്ടാവും. ഇതിനിടെ ബസ് ഉടമക്കെതിരേയും കേസെടുക്കാന്‍ നിര്‍ദേശം ഉണ്ട്. അപകടത്തില്‍പ്പെട്ട ടൂറിസ്റ്റ് ബസ്സിന്റെ വേഗ പൂട്ടില്‍ കൃത്രിമത്വം നടത്തിയതായി കണ്ടെത്തിയിട്ടുണ്ട്.
