ചെന്നൈ : നടന് വിശാലിന്റെ വീടിന് നേരെ സംഘം ചേര്ന്ന് ആക്രമണം. വിശാലിന്റെ ചെന്നൈ അണ്ണാനഗറിലുള്ള വീടിനുനേരെ തിങ്കളാഴ്ചയോടെ അജ്ഞാത സംഘമെത്തി കല്ലെറിയുകയായിരുന്നു. ആക്രമണത്തില് വീടിന്റെ ബാല്ക്കണിയിലെ ഗ്ലാസുകള് തകരുകയും വീടിന് മറ്റ് കേടുപാടുകള് സംഭവിക്കുകയും ചെയ്തു.
നടന്റെ പരാതിയില് പോലീസ് കേസെടുത്ത് അന്വേഷണം നടത്തിവരികയാണ്. ചുവന്ന കാറിലെത്തിയ ഒരു സംഘമാളുകളാണ് ആക്രമണത്തിന് പിന്നിലെന്ന് പരാതിയില് ആരോപിക്കുന്നുണ്ട്. സംഭവത്തിന്റെ സിസിടിവി ദൃശ്യങ്ങളും വിശാല് പോലീസിന് കൈമാറി. മാതാപിതാക്കള്ക്കൊപ്പമാണ് താരം ഇവിടെ കഴിയുന്നത്.
തമിഴ് സിനിമാ താരങ്ങളുടെ സംഘടനയായ നടികര് സംഘത്തിന്റെ ജനറല് സെക്രട്ടറിയാണ് വിശാല്. തമിഴിലെ മുന്നിര പ്രൊഡക്ഷന് കമ്പനിയായ ലൈക്ക പ്രൊഡക്ഷന്സും വിശാലുമായുള്ള തര്ക്കവുമായി ബന്ധപ്പെട്ടുള്ള കേസ് കോടതിയുടെ പരിഗണനയിലാണ്.
എ വിനോദ് കുമാര് സംവിധാനം ചെയ്യുന്ന ലാത്തിയാണ് വിശാലിന്റേതായി പ്രദര്ശനത്തിന് തയ്യാറെടുക്കുന്ന ചിത്രം. ഓഗസ്റ്റില് റിലീസാകേണ്ടിയിരുന്ന ചിത്രത്തിന്റെ റിലീസ് മാറ്റിവെച്ചെങ്കിലും പുതിയ തീയതി പ്രഖ്യാപിച്ചിട്ടില്ല. ആധിക് രവിചന്ദര് സംവിധാനം ചെയ്യുന്ന മാര്ക്ക് ആന്റണിയാണ് ചിത്രീകരണത്തിലുള്ള സിനിമ.
