ന്യൂദല്ഹി: ഹര്ത്താലിന്റെ മറവില് പോപ്പുലര് ഫ്രണ്ട് കേരളത്തിലുടനീളം നടത്തിയ അക്രമങ്ങളെപ്പറ്റി വിശദമായ റിപ്പോര്ട്ട് നല്കാന് കേന്ദ്ര സര്ക്കാര് കേരളത്തോടു നിര്ദേശിച്ചു, കേന്ദ്ര ആഭ്യന്തര മന്ത്രാലയമാണ് റിപ്പോര്ട്ട് തേടിയത്. രാജ്യവിരുദ്ധ പ്രവര്ത്തനം നടത്തിയ പോപ്പുലര് ഫ്രണ്ടിനെതിരേ 15 സംസ്ഥാനങ്ങളിലായി 93 കേന്ദ്രങ്ങളില് റെയ്ഡ് നടത്തി നൂറിലേറെ പേരെ അറസ്റ്റു ചെയ്തിട്ടും കേരളത്തില് മാത്രമാണ് ഹര്ത്താലും വലിയ തോതിലുള്ള അക്രമങ്ങളും നടന്നതെന്നു കേന്ദ്രം ചൂണ്ടിക്കാട്ടുന്നു.
വെള്ളിയാഴ്ചത്തെ ഹര്ത്താലില് കേരളത്തില് അങ്ങോളമിങ്ങോളം പോപ്പുലര് ഫ്രണ്ടുകാര് അക്രമം അഴിച്ചുവിട്ടിരുന്നു. 70 കെഎസ്ആര്ടിസി ബസ്സുകള് തകര്ത്ത അവര് ഇതര വാഹനങ്ങളും ആക്രമിച്ചു. പത്തു ഡ്രൈവര്മാരും പോലീസുകാരും അടക്കം നിരവധി പേര്ക്കാണ് പരിക്കേറ്റത്. സംഭവത്തോടനുബന്ധിച്ച് പോലീസ് 281 കേസുകളാണ് എടുത്തിട്ടുള്ളത്.
പോപ്പുലര് ഫ്രണ്ടിന്റെ അക്രമം നേരിടുന്നതില് സംസ്ഥാന പോലീസ് ഗുരുതര വീഴ്ച വരുത്തിയെന്നാണ് സൂചന. മിന്നല് ഹര്ത്താലില് അക്രമങ്ങള്ക്കു സാധ്യതയുണ്ടെന്നു രഹസ്യാന്വേഷണ ഏജന്സികള് റിപ്പോര്ട്ട് നല്കിയതാണ്. മുമ്പും പോപ്പുലര് ഫ്രണ്ടിന്റെ ഹര്ത്താലുകള് അക്രമാസക്തമായിരുന്നു. അതുപോലെ അക്രമമുണ്ടാകുമെന്ന മുന്നറിയിപ്പ് ആഭ്യന്തര വകുപ്പ് അവഗണിച്ചെന്നാണ് സംശയിക്കേണ്ടത്. പലയിടങ്ങളിലും പോലീസ് തികഞ്ഞ നിഷ്ക്രിയത്വം പാലിക്കുകയായിരുന്നു. ഇക്കാര്യം മാധ്യമ റിപ്പോര്ട്ടുകളിലുണ്ട്. കണ്മുമ്പില് അക്രമങ്ങള് നടന്നിട്ടും പോലീസ് ലാത്തിയും തൂക്കി നില്ക്കുന്ന വീഡിയോകളാണ് പുറത്തു വന്നിട്ടുള്ളത്.
