തിരുവനന്തപുരം: സംസ്ഥാന വ്യാപകമായി പോപ്പുലര് ഫ്രണ്ട് ഓഫീസുകളിലും നേതാക്കളുടെ വീടുകളിലും റെയ്ഡ് നടത്തിയ ദേശീയ അന്വേഷണ ഏജന്സി (എന്.ഐ.എ) പ്രമുഖ നേതാക്കളെ എല്ലാം കസ്റ്റഡിയിലെടുത്തു. സംസ്ഥാന ചെയര്മാന്, പ്രസിഡഡന്റ്, സെക്രട്ടറി ഉള്പ്പെടെയുള്ളവര് കസ്റ്റഡിയിലാണ്. ചെയര്മാന് ഒ എം എ സലാമിനെ വെളുപ്പാന് കാലത്ത് മഞ്ചേരിയിലെ വീട്ടില്നിന്നാണ് പൊക്കിയത്. വൈസ് പ്രസിഡണ്ട് ഇ എം അബ്ദുള് റഹ്മാനെ എറണാകുളത്തെ വിട്ടില്നിന്ന പിടിച്ചു. സംസ്ഥാന സമിതിയംഗം യഹിയ തങ്ങളെ തൃശ്ശൂരില്നിന്നാണ് എന്ഐഎ സംഘം കസ്റ്റഡിയിലെടുത്തത്. പോപ്പുലര് ഫ്രണ്ട് നേതാവ് അഷറഫ് മൗലവിയുടെ പൂന്തുറയിലെ വീട്ടിലുംപാലക്കാട് സംസ്ഥാന സമിതിയംഗം റൗഫിന്റെ കരിമ്പുള്ളിയിലെ വീട്ടിലും പരിശോധന നടത്തി.കോട്ടയം ജില്ലാ പ്രസിഡന്റ് സൈനുദീന്റെ വീട്ടിലും പത്തനംതിട്ട ജില്ലാ സെക്രട്ടറി സാദിഖ് അഹമ്മദിന്റെ കൊന്നമൂട്ടിലെ വീട്ടിലും റയ്ഡ് നടന്നു.
ദല്ഹിയില് രജിസ്റ്റര് ചെയ്ത തീവ്രവാദ സ്വഭാവമുള്ള കേസിന്റെ അടിസ്ഥാനത്തിലാണ് സംസ്ഥാന വ്യാപക റെയ്ഡ്.. തിരുവനന്തപുരം, കൊല്ലം, പത്തനംതിട്ട, കോട്ടയം, തൃശ്ശൂര്, കണ്ണൂര് ജില്ലകളില് റെയ്ഡ് നടന്നു.
ബുധനാഴ്ച അര്ധരാത്രിയോടെയാണ് എന്ഐഎ ഉദ്യോഗസ്ഥര് റെയ്ഡിനായി എത്തിയത്. സിആര്പിഎഫ് സുരക്ഷയോടെ ആയിരുന്നു റെയ്ഡ്. പലസ്ഥലത്തും പോപ്പുലര് ഫ്രണ്ടിന്റെ പ്രാദേശിക നേതാക്കളും റെയ്ഡിന് മുന്നോടിയായി കഴിഞ്ഞ ദിവസങ്ങളില്തന്നെ സി.ആര്.പി.എഫ് സംഘം കൊച്ചിയില് എത്തിയിരുന്നു. സംസ്ഥാന പോലീസിനെപ്പോലും ഒഴിവാക്കി ആയിരുന്നു റെയ്ഡ്. വിവിധ സ്ഥലങ്ങളില്നിന്ന് അറസ്റ്റിലായവരെ കൊച്ചിയിലെ എന്ഐഎ ഓഫീസില് എത്തിച്ചിട്ടുണ്ട്.
കേരളത്തില് 50 സ്ഥലങ്ങളിലാണ് എന്ഐഎ പരിശോധന നടത്തുന്നത്.റെയ്ഡിനെതിരെ പലയിടത്തും പ്രവര്ത്തകരുടെ പ്രതിഷേധമുണ്ട്. തിരുവനന്തപുരത്തെ പോപുലര് ഫ്രണ്ട് ഓഫീസിന് മുന്നിലെ പ്രതിഷേധം സംഘര്ഷത്തിലേക്ക് നീങ്ങി. ഉദ്യോഗസ്ഥര് സഞ്ചരിച്ച വാഹനത്തില് പ്രവര്ത്തകര് അടിച്ചു തടയാന് ശ്രമിച്ചു. കൂടുതല് പൊലീസുകാര് സ്ഥലത്തെത്തി.
