കൊല്ലം: രാഹുല്ഗാന്ധി നയിക്കുന്ന ഭാരത് ജോഡോ യാത്രയ്ക്ക് പിരിവ് നല്കാത്തതിന് കടയില് കയറി അക്രമം നടത്തിയ സംഭവത്തില് കോണ്ഗ്രസ് മൂന്നുപേരെ സസ്പെന്ഡ് ചെയ്തു. കൊല്ലം വിളക്കുടി വെസ്റ്റ് മണ്ഡലം പ്രസിഡന്റ് സലീം സൈനുദ്ദീന്, ഡിസിസി അംഗം കുന്നിക്കോട് ഷാജഹാന്, യൂത്ത് കോണ്ഗ്രസ് സംസ്ഥാന സെക്രട്ടറി എച്ച്. അനീഷ്ഖാന് എന്നിവരെ പാര്ട്ടിയില് നിന്ന് സസ്പെന്ഡ് ചെയ്തതായി കെപിസിസി പ്രസിഡന്റ് കെ. സുധാകരന് അറിയിച്ചു.
കുന്നിക്കോട്ടെ പച്ചക്കറി വ്യാപാരം നടത്തുന്ന പുനലൂര് സ്വദേശി മുഹമ്മദ് അനസിന്റെ കടയ്ക്ക് നേരെയാണ് വ്യാഴാഴ്ച വൈകിട്ട് ആക്രമണം ഉണ്ടായത്. യാത്രയുടെ ഭാഗമായി 2000 രൂപയാണ് വ്യാപാരിയോട് പ്രദേശത്തെ പ്രാദേശിക കോണ്ഗ്രസ് പ്രവര്ത്തകര് ചോദിച്ചത്.
എന്നാല്, കച്ചവടം കുറവാണെന്നും അതിനാല് 500 രൂപ മാത്രമേ നല്കാന് സാധിക്കുകയുള്ളുവെന്നും അനസ് പറഞ്ഞു. ഇത് കുറഞ്ഞുപോയെന്ന് പറഞ്ഞ് കടയില് കയറി ആക്രമണം നടത്തുകയായിരുന്നു. സാധനങ്ങള് വലിച്ചുവാരി പുറത്തേക്ക് ഇടുകയും ത്രാസ് തകര്ക്കുകയും ചെയ്തു. കടയിലെ തൊഴിലാളികള്ക്ക് നേരെയും കോണ്ഗ്രസുകാര് ഭീഷണി മുഴക്കിയിരുന്നു. കടയുടമയുടെ പരാതിയില് കുന്നിക്കോട് പോലീസ് കേസെടുത്തിട്ടുണ്ട്.
