കൊല്ലം : രാഹുല്‍ ഗാന്ധി നയിക്കുന്ന ഭാരത് ജോഡോ യാത്രയ്ക്ക് ആവശ്യപ്പെട്ട തുക നല്‍കാത്തതിനെ തുടര്‍ന്ന് കടയില്‍ കയറി ആക്രമണം നടത്തിയത് വിവാദമായതോടെ മൂന്ന് പ്രവര്‍ത്തകരേയും സസ്‌പെന്‍ഡ് ചെയ്ത് കോണ്ഗ്രസ്. പിരിവ് ആവശ്യപ്പെട്ടിട്ട് നല്‍കാത്തതിന് കടയിലെ സാധനങ്ങള്‍ നശിപ്പിക്കുകയും ഉടമയുമായി വാക്കു തര്‍ക്കം ഉണ്ടാവുകയും ചെയ്തിരുന്നു. ഇതിന്റെ വീഡിയോ ദൃശ്യങ്ങള്‍ പുറത്തുവരികയും ചെയ്തതോടെയാണ് ഇപ്പോള്‍ നടപടി സ്വീകരിച്ചിരിക്കുന്നത്. കെപിസിസി പ്രസിഡന്റ് കെ. സുധാകരനാണ് ഇവരെ സസ്‌പെന്‍ഡ് ചെയ്തത്.
കൊല്ലത്തെ വിളക്കുടി വെസ്റ്റ് മണ്ഡലം പ്രസിഡന്റ് സലീം സൈനുദ്ദീന്‍, ഡിസിസി അംഗം കുന്നിക്കോട് ഷാജഹാന്‍, യൂത്ത് കോണ്ഗ്രസ് സംസ്ഥാന സെക്രട്ടറി എച്ച്. അനീഷ് ഖാന്‍ എന്നിവരെയാണ് പാര്‍ട്ടിയില്‍ നിന്ന് സസ്‌പെന്‍ഡ് ചെയ്തത്. കോണ്ഗ്രസ് ആശയങ്ങള്‍ക്കെതിരായാണ് ഇവര്‍ പ്രവര്‍ത്തിച്ചത്. ഇത്തരം നടപടികള്‍ അംഗീകരിക്കാനാവില്ലെന്നും കെ. സുധാകരന്‍ വിഷയത്തില്‍ പ്രതികരിച്ചു.
രാഹുലിന്റെ ഭാരത് ജോഡോ യാത്ര ഇന്ന് കൊല്ലത്താണ്. പാര്‍ട്ടിയുടെ ദേശീയ നേതാവ് കേരളത്തില്‍ തുടരുന്ന സാഹചര്യത്തില്‍ ഇത്തരം പ്രശ്‌നങ്ങള്‍ റിപ്പോര്‍ട്ട് ചെയ്യപ്പെടുന്നത് സംസ്ഥാന നേതാക്കള്‍ക്ക് ക്ഷീണമാകും. അതിനാലാണ് ആരോപിതരായ കോണ്ഗ്രസ് നേതാക്കള്‍ക്കു നേരെ ഇടനുള്ള സസ്‌പെന്‍ഷന്‍ നടപടി. കൂടാതെ ഇവര്‍ക്കുനേരെ അന്വേഷണമുണ്ടാകുമെന്നും പാര്‍ട്ടി വൃത്തങ്ങള്‍ അറിയിച്ചിട്ടുണ്ട്.
വ്യാഴാഴ്ച വൈകിട്ട് അഞ്ചരയ്‌ക്ക് കുന്നിക്കോട്ടെ പച്ചക്കറി വ്യാപാരിയായ അനസിന്റെ കടയിലാണ് അക്രമം നടന്നത്. ഭാരത് ജോഡോ യാത്രയുടെ കൊല്ലത്തെ പര്യടനത്തിന് രണ്ടായിരം രൂപയുടെ രസീത് അനസിന് എഴുതി നല്‍കി. പണം വാങ്ങാനെത്തിയപ്പോള്‍ അഞ്ഞൂറ് രൂപ മാത്രമേയുള്ളൂവെന്ന് ഇയാള്‍ അറിയിച്ചു.
ഇതോടെ രണ്ടായിരം തന്നെ നല്‍കണമെന്ന് ആവശ്യപ്പെടുകയും ഇത് വാക്കുതര്‍ക്കത്തിലേക്ക് എത്തുകയും കോണ്ഗ്രസ് നേതാക്കള്‍ കടയിലെ സാധനങ്ങളെല്ലാം വാരിയിട്ട് നശിപ്പിക്കുകയുമായിരുന്നു. അതേസമയം സാധനങ്ങള്‍ വലിച്ചെറിഞ്ഞിട്ടില്ലെന്നും സിപിഎം നേതാക്കള്‍ ഭാരത് ജോഡോ യാത്രയെ ആക്ഷേപിക്കാന്‍ പ്രശ്‌നങ്ങളുണ്ടാക്കുകയാണെന്നുമാണ് വിലക്കുടി വെസ്റ്റ് മണ്ഡലം കമ്മറ്റി പ്രസിഡന്റ് പ്രതികരിച്ചത്.
