കൊച്ചി: നാല് ദിവസത്തെ കേരളസന്ദര്‍ശനത്തിനെത്തിയ ആര്‍എസ്എസ് സര്‍സംഘചാലക് ഡോ മോഹന്‍ ഭാഗവത്. പ്രാന്തകാര്യാലയമായ എളമക്കര മാധവനിവാസിലെത്തി മുതിര്‍ന്ന പ്രചാരകന്മാരായ ആര്‍.ഹരി, എം.എ. കൃഷ്ണന്‍ എന്നിവരെ സന്ദര്‍ശിച്ചു. രാവിലെയായിരുന്നു കൂടിക്കാഴ്ച. തുടര്‍ന്ന് അദ്ദേഹം തൃശ്ശൂര്‍ ശങ്കരമഠത്തില്‍ ചേരുന്ന ആര്‍എസ്എസ് സംഘടനായോഗങ്ങളില്‍ പങ്കെടുത്തു. യോഗങ്ങള്‍ ഇന്നും തുടരും.
ഇന്നലെ കൊല്ലം വള്ളിക്കാവ് അമൃതപുരി ആശ്രമത്തിലെത്തി മാതാ അമൃതാനന്ദമയീദേവിയെ കണ്ടതിന് ശേഷം രാത്രിയോടെയാണ് അദ്ദേഹം പ്രാന്തകാര്യാലയത്തിലെത്തിയത്. രാവിലെ ആര്‍. ഹരിയെയും എം.എ. കൃഷ്ണനെയും കണ്ട് ആരോഗ്യവിവരങ്ങള്‍ അന്വേഷിച്ചു. മുതിര്‍ന്ന കാര്യകര്‍ത്താക്കന്മാരുമായി കുശലം പങ്കുവച്ചതിന് ശേഷമാണ് തൃശ്ശൂരേക്ക് പോയത്.
നാളെ പുലര്‍ച്ചെ ഗുരുവായൂര്‍ ക്ഷേത്രദര്‍ശനം നടത്തുന്ന സര്‍സംഘചാലക് രാവിലെ 10ന് രാധേയം ആഡിറ്റോറിയത്തില്‍ ആര്‍എസ്എസ് പ്രാന്തകാര്യകര്‍ത്താക്കളുടെ ബൈഠക്കില്‍ പങ്കെടുക്കും. വൈകിട്ട് ഗുരുവായൂര്‍ ശ്രീകൃഷ്ണകോളജ് ഗ്രൗണ്ടില്‍ നടക്കുന്ന പൂര്‍ണഗണവേഷ സാംഘിക്കില്‍ അദ്ദേഹം പങ്കെടുക്കും. തിങ്കളാഴ്ച രാവിലെ അദ്ദേഹം മടങ്ങും
