തിരുവനന്തപുരം: ഓണക്കാല പാല് വില്പ്പനയില് സര്വകാല റിക്കാര്ഡിട്ട് മില്മ. 4 മുതല് 7 വരെയുള്ള നാല് ദിവസങ്ങളില് 94,59,576 ലിറ്റര് പാക്കറ്റ് പാലാണ് വിറ്റത്. ഓണക്കാല വില്പ്പനയില് മുന്വര്ഷത്തേക്കാള് 11.12 ശതമാനത്തിന്റെ വര്ധനവാണുള്ളത്. തിരുവോണ ദിവസം മാത്രം 35,11,740 ലിറ്റര് പാല് വില്പ്പനയാണ് നടന്നത്. കഴിഞ്ഞ വര്ഷത്തെ തിരുവോണദിന വില്പ്പന 32,81,089 ലിറ്ററായിരുന്നു. 7.03 ശതമാനത്തിന്റെ വര്ധനവ്. ഇത് സര്വകാല റിക്കാര്ഡാണെന്ന് മില്മ ചെയര്മാന് കെ.എസ്. മണി പറഞ്ഞു.
തൈരിന്റെ വില്പ്പനയിലും നേട്ടമുണ്ടാക്കാന് മില്മയ്ക്കായി. നാലു ദിവസങ്ങളിലായി 11,30,545 കിലോ തൈരാണ് മില്മ വില്പ്പന നടത്തിയത്. കഴിഞ്ഞ വര്ഷത്തെ അപേക്ഷിച്ച് 18.26 ശതമാനത്തിന്റെ വര്ധനവ്. തിരുവോണ ദിവസത്തെ മാത്രം തൈരിന്റെ വില്പ്പന 3,45,386 കിലോയാണ്. കഴിഞ്ഞ വര്ഷത്തേക്കാള് 13.52 ശതമാനത്തിന്റെ വര്ധന.
എട്ടു ലക്ഷത്തോളം പാലട പായസം മിക്സ് ഓണവിപണിയിലെത്തിക്കാനും മില്മയ്ക്ക് സാധിച്ചു. ഓണക്കിറ്റില് ഉള്പ്പെടുത്തി സപ്ലൈകോ വഴി കേരളത്തിലെ 87 ലക്ഷം കാര്ഡ് ഉടമകള്ക്ക് 50 മില്ലിലിറ്റര് വീതം നെയ്യ് വിതരണം ചെയ്യാനും കണ്സ്യൂമര് ഫെഡ് വഴി മില്മ ഉത്പന്നങ്ങള് മാത്രം ഉള്പ്പെടുത്തിയ ഒരു ലക്ഷം മില്മ കിറ്റ് വിതരണം ചെയ്യാനും സാധിച്ചു. നെയ്യ്, വെണ്ണ, പനീര്, പേഡ, ഫ്ളേവേര്ഡ് മില്ക്ക്, ഐസ്ക്രീം, ലോങ് ലൈഫ് മില്ക്ക് തുടങ്ങിയ മില്മയുടെ മറ്റ് ഉത്പന്നങ്ങളുടെ വില്പ്പനയിലും ഗണ്യമായ വര്ധനവുണ്ടായി.
