ലണ്ടന്‍: ട്വന്റി 20 ലോകകപ്പിനുള്ള ഇംഗ്ലണ്ട് ടീമിനെ പ്രഖ്യാപിച്ചതിനു പിന്നാലെ സൂപ്പര്‍താരം ജോണി ബെയര്സ്റ്റോ ടീമില്‍ നിന്ന് പുറത്തായി. പരിക്കുമൂലം ബെയര്‍സ്റ്റോയ്‌ക്ക് ലോകകപ്പ് മുഴുവനായും നഷ്ടമാകും. ട്വന്റി 20 ലോകകപ്പ് ടീമിനെ പ്രഖ്യാപിച്ചതിനുപിന്നാലെ ബെയര്‍സ്റ്റോയെ നഷ്ടപ്പെട്ടത് ഇംഗ്ലണ്ട് ടീമിന് കനത്ത തിരിച്ചടിയായി. ഗോള്‍ഫ് കളിക്കുന്നതിനിടെ കാലിന് പരിക്കേറ്റ ബെയര്‍സ്റ്റോയ്‌ക്ക് ദക്ഷിണാഫ്രിക്കയ്‌ക്കെതിരായ മൂന്നാം ടെസ്റ്റും നഷ്ടമാകും. ടെസ്റ്റില്‍ താരത്തിന് പകരം നോട്ടിംഗ്ഹാംഷെയര്‍ ബാറ്ററായ ബെന്‍ ഡക്കറ്റിനെ ടീമിലുള്‍പ്പെടുത്തിയിട്ടുണ്ട്.
ലോകകപ്പിനുളള 15 അംഗ ടീമിന് പുറമെ പാക്കിസ്ഥാന്‍ പര്യടനത്തിനുള്ള 19 അംഗ ടീമിനെയും ഇംഗ്ലണ്ട് ഇന്ന് പ്രഖ്യാപിച്ചിരുന്നു. ഇതിലും ബെയര്സ്റ്റോ ഉണ്ടായിരുന്നു. ടി20യില്‍ അഞ്ച് പുതുമുഖങ്ങളാണ് പാക്കിസ്ഥാനെതിരായ ഇംഗ്ലണ്ട് ടീമിലുള്ളത്.
സമീപകാലത്തായി ബെയര്സ്റ്റോ തകര്‍പ്പന്‍ ഫോമിലാണ് കളിക്കുന്നത്. ട്വന്റി 20 ലോകകപ്പിനുള്ള ടീമില്‍ നിന്ന് ഓപ്പണര്‍ ജേസണ്‍ റോയിയും പുറത്തായിരുന്നു. റോയിക്ക് പകരം ബെയര്സ്റ്റോ ഓപ്പണറാകുമെന്നാണ് കരുതിയിരുന്നത്. ജോസ് ബട്‌ലറാണ് ടീം നായകന്‍.
