മുംബൈ: ഓഹരി വിപണിയില്‍ ചത്തതുപോലെ കിടക്കുകയായിരുന്നു എന്‍ഡിടിവിയുടെ ഓഹരി. എന്നാല്‍ കഴിഞ്ഞ ദിവസം അദാനി ഈ കമ്പനിയുടെ 29 ശതമാനത്തോളം ഓഹരി ഏറ്റെടുത്തതോടെ എന്‍ഡിടിവി ഓഹരി വില കുതിക്കുകയാണ്.
ശനിയാഴ്ച മാത്രം ഏകദേശം 4.99 ശതമാനത്തോളം വില കൂടി 427.95 രൂപയില്‍ അവസാനിച്ചു. കഴിഞ്ഞ മൂന്ന് ദിവസമായി 5 ശതമാനം വീതം ഓഹരി വില കുതിക്കുകയാണ്.കഴിഞ്ഞ ഒരു മാസമായി 50 ശതമാനത്തോളമാണ് എന്‍ഡിടിവി ഓഹരി വില കുതിച്ചത്.
അദാനിയുടെ കടന്നുവരവാണ് എന്‍ഡിടിവി ഓഹരിക്ക് ശാപമോക്ഷമായത്. മാത്രമല്ല, ഇനി ഒരു 26 ശതമാനം ഓഹരി കൂടി ഏറ്റെടുക്കാന്‍ തുറന്ന ഓഫര്‍ ഓഹരി ഉടമകളുടെ മുന്‍പില്‍ വെച്ചിരിക്കുകയാണ് അദാനി. ഇതിനാല്‍ കയ്യിലുള്ള ഓഹരികള്‍ വില്‍ക്കണോ അതോ എന്‍ഡിടിവി ഓഹരികള്‍ പുതുതായി വാങ്ങിക്കൂട്ടണോ എന്ന ആശങ്കയിലാണ് ഓഹരി നിക്ഷേപകര്‍.
കഴിഞ്ഞ ഒരു വര്‍ഷത്തോളമായി അദാനി എന്‍ഡിടിവിയെ വിലയ്‌ക്ക് വാങ്ങും എന്ന അഭ്യൂഹമുണ്ടായിരുന്നു. അതുകൊണ്ട് തന്നെ കഴിഞ്ഞ ആറ് മാസത്തില്‍ 186 ശതമാനം ഓഹരിവില കൂടിയിരുന്നു. ഒരു വര്‍ഷത്തിനുള്ളില്‍ 237 ശതമാനത്തോളം ഓഹരി വില കുതിച്ചിരുന്നു.
ഇക്കഴിഞ്ഞ ബുധനാഴ്ച എന്‍ഡിടിവി ഓഹരി വില കഴിഞ്ഞ 52 ആഴ്ചകള്‍ക്കിടയില്‍ ഏറ്റവും ഉയര്‍ന്ന നിരക്കില്‍ എത്തിയിരുന്നു. അതേ സമയം നിക്ഷേപകര്‍ക്കും എന്‍ഡിടിവിയുടെ ഓഹരി വില നിയന്ത്രണമില്ലാതെ മുകളിലേക്ക് കുതിക്കുന്നതില്‍ ആശങ്കയുണ്ട്.
കടുത്ത മോദി-ബിജെപി വിരോധിയായ എന്‍ഡിടിവിയുടെ സ്ഥാപകനും മാധ്യമവിദഗ്ധനുമായ പ്രണോയ് റോയി അദാനിയുടെ ഈ നീക്കത്തെ എതിര്‍ത്തിരുന്നു. അദാനി എന്‍ഡിടിവിയുടെ 29 ശതമാനം ഓഹരികള്‍ നേടിയത് നിയമവിരുദ്ധമാണെന്ന് വാദിച്ചിരുന്നു.
എന്നാല്‍ എന്‍ഡിടിവിയുടെ പ്രൊമോട്ടര്‍ കമ്പനിയായ ആര്‍ആര്‍പിആര്‍ ഹോള്‍ഡിംഗ്സ് പ്രൈ ലിമിറ്റഡിന്റെ കയ്യിലുണ്ടായിരുന്ന എന്‍ഡിടിവി ഓഹരികളാണ് അദാനി സ്വന്തമാക്കിയത്. അദാനിയുടെ സഹസ്ഥാപനമായ വിശ്വപ്രധാന്‍ കമേഴ്സ്യല്‍ പ്രൈ. ലിമിറ്റ‍ഡിന് ആര്‍ആര്‍പിആറിന്റെ ഓഹരികള്‍ വാങ്ങാന്‍ ഉള്ള അധികാരമാണ് അദാനി പ്രയോജനപ്പെടുത്തിയത്.
