ന്യൂദല്ഹി : രാജ്യ വിരുദ്ധ വാര്ത്തകള് പ്രചരിപ്പിച്ച ഒരു പാക്കിസ്ഥാനി ചാനല് ഉള്പ്പടെ എട്ട് യൂട്യൂബ് ചാനലുകള്ക്ക് കേന്ദ്ര സര്ക്കാര് നിരോധനം ഏര്പ്പെടുത്തി. രാജ്യ വിരുദ്ധ വാര്ത്തകള് പ്രചരിപ്പിച്ച വാര്ത്താ യൂ ട്യൂബ് ചാനലുകളെയാണ് കേന്ദ്രസര്ക്കാര് ബാന് ചെയ്്തിരിക്കുന്നത്. കേന്ദ്ര വാര്ത്താവിതരണ മന്ത്രാലയമാണ് ഇതുസംബന്ധിച്ചുള്ള റിപ്പോര്ട്ട് പുറത്തുവിട്ടത്.
ലോക് തന്ത്ര ടിവി (12.90 ലക്ഷം സബ്സ്ക്രൈബര്മാര്), യു&വി ടിവി ( 10.20 ലക്ഷം സബ്സ്ക്രൈബര്മാര്), എഎം റാസ് വി (95900 സബ്സ്ക്രൈബര്മാര്), ഗൗരവ്ഷാലി പവന് മിതിലാഞ്ചല് (7 ലക്ഷം സബ്സ്ക്രൈബര്മാര്), സര്ക്കാരി അപ്ഡേറ്റ് (80,900 സബ്സ്ക്രൈബര്മാര്) സബ് കുച്ഛ് ദേഖോ (19.40 ലക്ഷം സബ്സ്ക്രൈബര്മാര്) എന്നീ ഇന്ത്യയില് നിന്നുള്ള യൂ ട്യൂബ് ചാനലുകളും ന്യൂസ് കി ദുനിയ (97000 സബ്സ്ക്രൈബര്) എന്ന ചാനലുകളുമാണ് കേന്ദ്ര സര്ക്കാര് നിരോധിച്ചത്.
114 കോടി കാഴ്ചക്കാരും 85 ലക്ഷം സബ്സ്ക്രൈബര്മാരുമാണ് ഈ ചാനലുകള്ക്ക് ഉള്ളതെന്നാണ് കേന്ദ്ര വാര്ത്താവിനിമയ മന്ത്രാലയത്തിന്റെ പ്രസ്താവനയില് പറയുന്നത്. മതപരമായ നിര്മിതികള് തര്ക്കുന്നതിന് സര്ക്കാര് ഉത്തരവിടുന്നതായും മതപരമായ ആഘോഷങ്ങള് സര്ക്കാര് വിലക്കുന്നു, ഇന്ത്യയില് മതയുദ്ധം പ്രഖ്യാപിക്കുന്നു തുടങ്ങിയ വ്യാജ വാര്ത്തകളാണ് ഈ ചാനലുകളിലുള്ളത്. ഇന്ത്യയിലെ മത വിഭാഗങ്ങള്ക്കിടയില് പരസ്പര വിദ്വേഷം പടര്ത്തുകയെന്ന ഉദ്ദേശത്തോടുകൂടിയുള്ളതാണ് ഈ ചാനലുകളിലെ ഉള്ളടക്കങ്ങള്. ഈ യൂട്യൂബ് ചാനലുകള് ഇന്ത്യന് സായുധ സേന, ജമ്മു & കശ്മീര് തുടങ്ങിയ വിവിധ വിഷയങ്ങളില് വ്യാജ വാര്ത്തകള് പോസ്റ്റ് ചെയ്യാറുണ്ടായിരുന്നു
ഇത്തരത്തിലുള്ള ഉള്ളടക്കങ്ങള് രാജ്യത്ത് സാമുദായിക അനൈക്യം സൃഷ്ടിക്കാനുള്ള സാധ്യതയുള്ളവയാണ്. 2021 ലെ ഐടി നിയമത്തിന് കീഴിലുള്ള അടിയന്തര അധികാരങ്ങള് ഉപയോഗപ്പെടുത്തി കഴിഞ്ഞ ചൊവ്വാഴ്ചയാണ് ഈ ഉള്ളടക്കങ്ങള് ബ്ലോക്ക് ചെയ്യാന് കേന്ദ്രം ഉത്തരവിറക്കിയത്.
വ്യാജവും ഉദ്വേഗജനകവുമായ തമ്പ് നെയ്ലുകളാണ് ഈ ചാനലുകളിലെ വീഡിയോകള്ക്കുള്ളത്. ഇവയുടെ ഉള്ളടക്കം പൂര്ണ്ണമായും തെറ്റാണെന്നും സെന്സിറ്റീവ് ആണെന്നും നിരീക്ഷിക്കുന്നുവെന്നും കേന്ദ്ര സര്ക്കാര് പ്രസ്താവനയില് പറയുന്നുണ്ട്. 2021 ഡിസംബര് മുതല് 102 യൂട്യൂബ് ചാനലുകള് ബ്ലോക്ക് ചെയ്യാനും മറ്റ് നിരവധി സോഷ്യല് മീഡിയാ അക്കൗണ്ടുകള് ബ്ലോക്ക് ചെയ്യാനുമുള്ള ഉത്തരവ് സര്ക്കാര് ഇറക്കിയിട്ടുണ്ട്.
