ലഖ്നൗ: പ്രമുഖ മധുരപലഹാര നിര്മാതാക്കളായ കാഡ്ബറിയുടെ ഗോഡൗണില് വന് മോഷണം. 17 ലക്ഷം രൂപയുടെ ചോക്ലേറ്റുകള് ഗോഡൗണില്നിന്ന് കവര്ന്നതായി കാഡ്ബറി വിതരണക്കാരനായ രാജേന്ദ്രസിങ് സിദ്ധു പറഞ്ഞു. സംഭവത്തില് ചിന്ഹാത്ത് പോലീസ് സ്റ്റേഷനില് പരാതി നല്കിയിട്ടുണ്ട്.
ഉത്തര്പ്രദേശിലെ ലഖ്നൗവില് പ്രവര്ത്തിക്കുന്ന ഗോഡൗണിലാണ് മോഷണം നടന്നത്. ചിന്ഹട്ടിലെ തന്റെ പഴയ വീട്ടില് നിന്നും ഗോമതി നഗറിലെ വീട്ടിലേക്ക് മാറിയപ്പോള് പഴയ വീട് ഗോഡൗണ് ആയി ഉപയോഗിക്കാന് തുടങ്ങിയത്. മോഷണം ശ്രദ്ധയില്പെട്ട അയല്വാസി വീടിന്റെ വാതില് തകര്ന്നു കിടക്കുന്നതായി രാജേന്ദ്രസിങ് സിദ്ധുവിനെ വിളിച്ചറിയിച്ചു. സിംഗ് വീട്ടിലെത്തി പരിശോധിച്ചപ്പോളാണ് മോഷണം നടന്നതായി തെളിഞ്ഞത്. രാത്രിയില് വാഹനത്തിന്റെ ശബ്ദം കേട്ടതായി മറ്റൊരു അയല്ക്കാരന് പറഞ്ഞു.
മോഷണം നടത്തിയവരെക്കുറിച്ച് എന്തെങ്കിലും വിവരം ലഭിക്കുന്നവര് അറിയിക്കണമെന്നും കാഡ്ബറി വിതരണക്കാരനായ രാജേന്ദ്രസിങ് സിദ്ധു അഭ്യര്ഥിച്ചു. കാഡ്ബറി സൂക്ഷിച്ചിരുന്ന 150 അധികം പെട്ടികള് മോഷണം പോയെന്നാണ് പ്രാഥമിക വിവരം. ഗോഡൗണിലെ സിസിടിവി ക്യാമറകളും കള്ളന്മാര് കൊണ്ടുപോയി.
